Mirziyoyev Tibbiyot xodimlari kuni munosabati bilan shifokorlarni mukofotladi

Farmon 26-oktabr kuni eʼlon qilindi. Shifokorlarga faxriy unvonlar berildi, orden va medallar topshirildi. Hujjatda mukofotlash asoslari qatorida sogʻliqni saqlash va farmatsevtika sohasini xalqaro standartlar asosida rivojlantirish, tibbiy xizmatlar sifatini oshirish, ilgʻor diagnostika va davolash usullarini joriy etish, shuningdek, sohani raqamlashtirish koʻrsatib oʻtilgan.

«Oʻzbekiston Respublikasida xizmat koʻrsatgan sogʻliqni saqlash xodimi» unvoniga toʻrt nafar mutaxassis sazovor boʻldi: Respublika ixtisoslashtirilgan nefrologiya va buyrak transplantatsiyasi ilmiy-amaliy tibbiyot markazi direktori Botir Daminov, Respublika ixtisoslashtirilgan onkologiya va tibbiy radiologiya ilmiy-amaliy tibbiyot markazi qorin boʻshligʻi onkoxirurgiyasi boʻlimi ilmiy rahbari Mirjalol Joʻrayev, Jarrohlik angionevrologiyasi markazi direktori Shavkat Karimov hamda Koʻz mikroxirurgiyasi markazi direktori Azamat Yusupov. «Oʻzbekiston Respublikasida xizmat koʻrsatgan yoshlar murabbiysi» unvoni bilan Toshkent davlat tibbiyot universiteti dermatovenerologiya va kosmetologiya kafedrasi professori Adhamjon Vaisov taqdirlandi.

46 nafar kishi ordenlar bilan taqdirlandi. «Fidokorona xizmatlari uchun» ordeni Qoʻqon shahar tibbiyot birlashmasi nevrologi Aziz Aliyev va Respublika ixtisoslashtirilgan pediatriya ilmiy-amaliy tibbiyot markazi laboranti Nazira Alimuhamedovaga topshirildi, «Mehnat shuhrati» ordeni bilan Fargʻonadagi «Central Asian medical university» nodavlat oliy taʼlim muassasasi muassisi Nurillo Mamasodiqov mukofotlandi. I darajali «Sogʻlom avlod uchun» ordenini sakkiz kishi, II darajalisini yetti kishi, «Doʻstlik» ordenini toʻqqiz kishi, I darajali «Salomatlik» ordenini uch kishi, II darajalisini 16 kishi oldi.

33 nafar kishi medallar bilan taqdirlandi: «Jasorat» medali — uch kishiga, «Sodiq xizmatlari uchun» — toʻrt kishiga, «Sogʻlom turmush» — sakkiz kishiga, «Kelajak bunyodkori» — bir kishiga, «Shuhrat» medali — 17 kishiga berildi.