Sogʻliqni saqlash vazirligi Koreya kompaniyasi bilan Toshkentdagi onkomarkaz boʻyicha shartnoma imzoladi

Vazirlik tomonidan hujjatni idora rahbari Eldor Odilov, kompaniya tomonidan esa uning vitse-prezidenti Li Von Sok imzoladi. Uchrashuvda tomonlar ishning keyingi bosqichlarini muhokama qildilar. Yangi markaz Koreya Eksport-import banki ishtirokida Toshkentda shakllantirilayotgan tibbiyot klasteri tarkibiga kiradi.

AUM & LEE konsorsiumi binoni loyihalashtirish, qurilishni boshqarish va nazorat qilish, shuningdek, tibbiy asbob-uskunalarni tanlash boʻyicha konsalting xizmatlarini koʻrsatadi. Maslahatlar markazning tibbiy xizmatlarini rejalashtirish va uning axborot tizimiga ham tegishli boʻladi.

Boʻlgʻusi muassasa xodimlari uchun uch bosqichda amaliy oʻqitish rejalashtirilmoqda. Dastur tibbiy yordam sifati, radiologiya, yadro tibbiyoti va nur terapiyasini qamrab oladi.

«Biz uchun markazni yuqori sifat bilan qurish muhim. Biz Koreya tomonining tajribasi va ish sifatiga ishonamiz», — deya vazirning soʻzlarini keltiradi matbuot xizmati.