Mirziyoyev 2027-yildan bepul dorilar roʻyxati kengaytirilishini eʼlon qildi

Hozirda bepul berilayotgan 69 turdagi dorining 28 tasi reimburssiya dasturi orqali taqdim etilmoqda. 2027-yildan boshlab bunday pozitsiyalar sonini 69 taga yetkazish rejalashtirilgan. Sogʻliqni saqlash vazirligi vakilining 2025-yil fevral oyidagi soʻzlariga koʻra, yashash joyidagi poliklinikalarda 28 turdagi diagnostik tekshiruv va 22 turdagi laboratoriya tahlili kafolatli ravishda mavjud.

Prezidentning taʼkidlashicha, oʻpka, oshqozon, yoʻgʻon ichak va prostata bezi saratonini erta skrining qilish Samarqanddan boshlanadi, 2028-yildan esa buni barcha hududlarga tatbiq etish rejalashtirilmoqda. Har yili ushbu maqsadlar uchun 700 milliard soʻm yoʻnaltiriladi. Sil, qandli diabet, yurak va qon tomir kasalliklari, bolalardagi onkogematologik kasalliklar hamda ayollardagi oʻsmalarni erta aniqlash boʻyicha amaldagi dasturlar davom ettiriladi.

Infarkt va insultni erta aniqlash hamda davolashga qaratilgan dastur Andijon, Fargʻona, Namangan, Samarqand va Toshkentda amal qilmoqda. Davlat rahbarining maʼlumotlariga koʻra, besh oy ichida ushbu kasalliklarning erta bosqichlaridagi oʻlim koʻrsatkichi 15 foizga kamaygan, "oltin soat" oraligʻidagi yordam esa 855 nafar kishini erta oʻlim va ogʻir oqibatlardan saqlab qolish imkonini bergan. Dasturni 2027-yilda barcha tuman va shaharlarga kengaytirish uchun 280 milliard soʻm ajratish koʻzda tutilgan.

Mirziyoyev, shuningdek, 28 ta tumanda sinovdan oʻtkazilgan birlamchi tibbiy yordamning yangi modeli haqida soʻzlab berdi: u yerda 7 million aholi oilaviy shifokorlarga biriktirilgan, tomonlarning majburiyatlari oʻzaro kelishuvlarda mustahkamlangan, laboratoriyalar ochilgan, bemorlarning harakatlanish yoʻnalishlari ishlab chiqilgan. 2027-yildan boshlab mazkur modelni yana 100 ta tumanda joriy etish rejalashtirilmoqda.