Qarshida gipofiz oʻsimtasi olib tashlanganidan soʻng bemor vafot etdi, tekshiruv ketmoqda

Idora maʼlumotlariga koʻra, 14-oktabr kuni 2005-yilda tugʻilgan Qarshi shahrida yashovchi fuqaro Qashqadaryo viloyati koʻp tarmoqli shifoxonasining neyroxirurgiya boʻlimiga yotqizilgan va unga «gipofiz adenomasi» tashxisi qoʻyilgan. Shifokorlarning aniqlik kiritishicha, bir necha yil davomida unda nafas olish qiyinlashishi, oʻsishdan orqada qolish hamda qoʻl va oyoq barmoqlarining yoʻgʻonlashishi kuzatilgan. Tekshiruv gipofizning katta oʻsimtasini, gormonal tahlillar esa oʻsish gormoni darajasi meʼyordan ancha yuqori ekanini koʻrsatgan.

Operatsiya 16-oktabr kuni oʻtkazilgan: oʻsimta burun orqali endoskopik usulda olib tashlangan, aralashuvda Toshkentdan kelgan mutaxassis ishtirok etgan. Boshqarma axborotiga koʻra, 19-oktabr kungi tekshiruvda bemorda asoratlar aniqlanmagan. Ertasi kuni uning ahvoli keskin yomonlashgan: qon bosimi koʻtarilgan, hushida, nafas olishida va yurak faoliyatida buzilishlar paydo boʻlgan. Qizga intensiv terapiya oʻtkazilgan, biroq u 26-oktabr kuni vafot etgan.

Sogʻliqni saqlash boshqarmasi oʻz xabarida oʻlim sababini maʼlum qilmadi. Podrobno.uz nashrining qayd etishicha, xabar ijtimoiy tarmoqlarda tarqalgach, ehtimoliy shifokorlar xatosi haqida taxminlar bildirilgan. Hodisa holatlarini prokuratura aniqlamoqda; idorada tekshiruv natijalari boʻyicha qoʻshimcha maʼlumot berishga vaʼda berildi.