Mirziyoyev: 2026-yilda tibbiyotni moliyalashtirish 49 trln soʻmga yetdi

Davlat rahbarining soʻzlariga koʻra, 2026-yilda sohaga 49 trln soʻm yoʻnaltirildi. DMED axborot tizimida 38 milliondan ortiq kishining elektron tibbiy kartasi ochilgan. Bundan tashqari, «Elektron poliklinika», «Elektron shifoxona» va «Elektron retsept» tizimlari faoliyat koʻrsatmoqda. Prezident islohotlarning yoʻnalishlari qatorida infarkt va insultlarga qarshi kurashish boʻyicha milliy tizim, onkologik hamda gematologik kasalliklarni erta aniqlash va palliativ yordamni aytib oʻtdi.

Mirziyoyevning taʼkidlashicha, 2026-yil oxirigacha barcha hududlarda davlat tibbiy sugʻurtasini joriy etishni yakunlash rejalashtirilmoqda, kafolatlangan tibbiy yordam esa barcha aholini qamrab olishi lozim boʻladi. 2027-yilga tibbiyot va farmatsevtika xodimlarini xalqaro standartlar boʻyicha davlat roʻyxatidan oʻtkazishni yoʻlga qoʻyish koʻzda tutilgan. 2027/2028-oʻquv yilidan boshlab tibbiyot mutaxassislari faqat rezidentura dasturlari asosida tayyorlanadi.

Tibbiyot oliy oʻquv yurtlariga qabul kvotasi 2017-yildan buyon 4,5 baravarga oshdi. Hozirda xorijiy talabalar soni 15 mingdan ziyod boʻlib, ular 41 ta davlatdan kelgan. Oʻn yil ichida xususiy klinikalar soni 3,5 mingtadan oshib, 9 mingtadan koʻproqni tashkil etdi, ruxsat etilgan ixtisoslashtirilgan yordam yoʻnalishlari esa 50 tadan 213 taga yetdi. Mahalliy farmatsevtika korxonalari 6,8 mingdan ortiq dori vositalari turini ishlab chiqarmoqda va ularni 50 dan ziyod davlatga yetkazib bermoqda.

Oʻzbekistonda oʻrtacha umr koʻrish davomiyligi, prezident keltirgan maʼlumotlarga koʻra, 73,8 yoshdan 75,4 yoshga uzaydi. U navbatdagi maqsad sifatida 78 yoshni qayd etdi.