Sogʻliqni saqlash vazirligi retseptsiz beriladigan dorilarni onlayn sotish qoidalarini taklif qildi

Loyiha 4-noyabr kuni normativ-huquqiy hujjatlar loyihalari muhokamasi portaliga joylashtirildi. Internet orqali faqat retseptsiz beriladigan preparatlarni, tibbiy buyumlarni esa Sogʻliqni saqlash vazirligi tasdiqlaydigan roʻyxat boʻyicha sotish mumkin boʻladi. Bunday savdoni litsenziyaga ega dorixonalar va ularning jihozlangan tarqatish punktlariga ega filiallari oʻz sayti, ilovasi orqali yoki marketpleys yoxud agregator bilan tuzilgan shartnomaga asosan amalga oshira oladi.

Dorixona maydonchada rekvizitlarini, jumladan, STIR, manzillar va litsenziya maʼlumotlarini, har bir preparat boʻyicha esa xalqaro patentlanmagan nomlanishi, dozasi, yaroqlilik muddati, mavjudligi, chakana narxi, savdo ustamasi hamda analoglarini koʻrsatishi shart boʻladi. Anhor.uzʼning qayd etishicha, ustama boʻyicha talab 2025-yil 1-apreldan retseptsiz dorilarga cheklangan savdo ustamalari bekor qilinishi fonida taklif etilmoqda.

Buyurtmalarni dorixonalar yoki shartnoma asosida uchinchi tomon kompaniyalari yetkazib berishi mumkin boʻladi; transport preparat yoʻriqnomasidagi shartlarni taʼminlashi lozim. Xaridor buyurtmani qabul qilish chogʻida uni tekshirish va kuryer orqali undan voz kechish, keyinroq aniqlangan kamchiliklar haqida esa platforma orqali xabar berish huquqiga ega. Agar mijoz bilan bogʻlanilmasa, buyurtmani uch kun davomida dorixonadan olib ketish mumkin boʻladi.

Retsept boʻyicha beriladigan, roʻyxatga olinmagan, qalbakilashtirilgan yoki markirovkalanmagan dorilar mavjud boʻlgan saytlar va ilovalarga kirishni Sogʻliqni saqlash vazirligi huzuridagi Farmatsevtika mahsulotlari xavfsizligi markazi soʻroviga koʻra Raqamli texnologiyalar vazirligi cheklashi mumkin boʻladi. Xavfli va sifatsiz preparatlarni xavf darajasiga qarab 24 soatdan 72 soatgacha boʻlgan muddatda savdodan chiqarish taklif qilinmoqda.