Qoraqalpogʻistonning ikki tumanidagi shifokorlarga 200 foizgacha ustama toʻlanadi

Oshirilgan toʻlovlar shifokorlarni olis tumanlarda ishlashga ragʻbatlantirishga qaratilgan. Davlat rahbarining tashrifi chogʻida taʼkidlanganidek, xuddi shunday ustamalar Moʻynoq tumanidagi tibbiyot xodimlari uchun allaqachon amal qilmoqda.

Yigʻilish davomida hududda sogʻliqni saqlashni rivojlantirishga oid maʼlumotlar ham keltirildi: tibbiyot muassasalariga 10 million dollarlik asbob-uskunalar berildi, bundan tashqari, tibbiy sugʻurta mexanizmi joriy etildi. Yil boshidan buyon Qoraqalpogʻistonda 1,5 mingta murakkab jarrohlik amaliyoti, jumladan, yurak va bosh miyadagi operatsiyalar, shuningdek, plastik jarrohlik sohasidagi amaliyotlar oʻtkazildi. Nukus markaziy shifoxonasida buyrak va jigar transplantatsiyasi amalga oshirilmoqda, Orolboʻyi bolalar shifoxonasida esa 150 turdagi yuqori texnologiyali yordam koʻrsatilmoqda.

Bundan tashqari, Nukusda mutaxassislarni attestatsiyadan oʻtkazish va malakasini oshirish uchun davlat-xususiy sheriklik asosida tibbiyot ilmiy akademiyasi tashkil etildi. Kelgusida uni, bolalar klinikasini, onkologiya markazini va yangi koʻp tarmoqli shifoxonani Universitet tibbiyot klasteriga birlashtirish rejalashtirilgan.