Oʻzbekiston, Ozarbayjon va Turkiya harbiylari qoʻshma mashgʻulotlarni boshladi

Birinchi bosqichning ochilish marosimi Qorabogʻ iqtisodiy rayonining Xoʻjavand tumanidagi "Qizilgʻoya" oʻquv markazida boʻlib oʻtdi. Tadbir doirasida uch davlatning davlat madhiyalari yangradi, shaxsiy tarkib minbar oldidan tantanali ravishda oʻtdi hamda Hazi Aslanov nomidagi Armiya gʻoyaviy va madaniy markazining ashula va raqs ansambli konsert dasturi namoyish etildi.

Mashgʻulotlar dasturi uch bosqichdan iborat. Mashgʻulotlar Qorabogʻ iqtisodiy rayonidagi "Qizilgʻoya", Naxchivon Avtonom Respublikasidagi "Qorabogʻlar" va Kaspiy dengizining Ozarbayjon sektoridagi "Buyuk Zira" poligonlarida rejalashtirilgan.

Manevrlarga ishtirokchi davlatlar mudofaa vazirliklarining boʻlinmalari, harbiy texnika, aviatsiya, uchuvchisiz uchish apparatlari va harbiy-dengiz kuchlari jalb etilgan. Oʻquv mashgʻulotlarining eʼlon qilingan maqsadlari qoʻshma operatsiyalarga tayyorgarlikni oshirish, qoʻshinlarning oʻzaro hamkorligini mashq qilish, tajriba almashish va oʻquv-mashgʻulot jarayonlarini unifikatsiya qilishni oʻz ichiga oladi.