«Yaylovlar toʻgʻrisida»gi qonun loyihasi yaylovlarda ekoturizm va asalarichilikka ruxsat berishni taklif qilmoqda

Hujjat yaylovlarda yangi faoliyat turlarini olib borishga ruxsat berishni taklif qilmoqda. Ular orasida ekoturizm, asalarichilik va dorivor oʻsimliklarni yetishtirish koʻrsatilgan. Qonun loyihasi bilan yaylovlardan foydalanishning yangi meʼyor va normativlarini joriy etish hamda ularni toifalarga ajratish ham taklif etilmoqda.

Uy xoʻjaliklari uchun aholi ulardan qonuniy va qulay foydalana olishi maqsadida jamoat yaylovlari institutini yaratish rejalashtirilmoqda. Bundan tashqari, hujjat yaylovlarni raqamli hisobga olish, shuningdek, ularning holatini doimiy kuzatib borish va nazorat qilish uchun moʻljallangan «E-yaylov» elektron platformasini ishga tushirishni nazarda tutadi.

Monitoring oʻtkazishda sunʼiy intellekt, geoinformatsion texnologiyalar va sunʼiy yoʻldosh maʼlumotlarini qoʻllash rejalashtirilgan. Xabarda aytilishicha, bu yaylovlar holatini yaxshiroq baholash, degradatsiya belgilarini oʻz vaqtida aniqlash va unga qarshi choralarni belgilash imkonini beradi.

Muhokama davomida fraksiya aʼzolari taklif etilayotgan meʼyorlar yaylovlar degradatsiyasiga qarshi kurashish, tuproq va oʻsimliklar qoplamini asrash, biologik xilma-xillikni himoya qilish hamda chorvachilikning ozuqa bazasini mustahkamlash uchun muhimligini taʼkidladilar. Ularning soʻzlariga koʻra, bu partiyaning dasturiy vazifalariga mos keladi.