Toshkentda III Oʻzbekiston-Rossiya mediaforumi ochildi

Forum 10-noyabrgacha davom etadi va Hilton Tashkent City mehmonxonasida boʻlib oʻtmoqda. Uznews maʼlumotlariga koʻra, unda 200 dan ortiq kishi, jumladan, Rossiyaning 50 dan ziyod mediakompaniyalari top-menejerlari ishtirok etmoqda. OʻzA xabar berishicha, dasturda toʻrtta sessiya oʻrin olgan: OAVning turizm, sport va gumanitar almashinuvdagi oʻrni, raqamli transformatsiya va sunʼiy intellekt, auditoriyaning oʻzgarayotgan odatlari hamda anʼanaviy qadriyatlarni asrab-avaylash haqida. Shuningdek, axborot xavfsizligi va bolalarni himoya qilish boʻyicha seminar hamda kontentni tekshirish boʻyicha mahorat darslari rejalashtirilgan.

Asadov oʻz nutqida mamlakat mediatashabbuslari boʻyicha maʼlumotlarni keltirdi: 2700 ga yaqin OAV mavjud boʻlib, ularning 67 foizi xususiy, internet qamrovi esa 94 foizga yetgan. Uning soʻzlariga koʻra, kontentning faol isteʼmolchilari 2017-yildagi 14,7 millionga nisbatan 32,7 milliondan oshdi. Bu yil noshirlik sohasidagi ishlab chiqarish hajmi ikki baravar oshdi: 60 milliondan ortiq nusxada 15 ming nomdagi kitob chop etildi. U, shuningdek, Oʻzbekiston haqidagi foto va videomateriallarni oʻz ichiga olgan Milliy mediabank ishga tushirilgani haqida soʻzlab berdi.

Matbuot kotibining soʻzlariga koʻra, feyklar va dipfeyklar hajmi har yili ikki baravar koʻpaymoqda. «Hech bir milliy mediatizim bunday chaqiriqlarga yolgʻiz oʻzi qarshi tura olmaydi», — dedi Asadov.

U qoʻshma amaliyotlar, jurnalistika maktablari va taʼlim platformalari orqali kadrlarni tayyorlashni, dezinformatsiyaga birgalikda qarshi kurashishni va axborotni tekshirishning umumiy standartlarini ishlab chiqishni, texnologik sheriklikni hamda tahririyatlar, jurnalistlar va blogerlar oʻrtasidagi toʻgʻridan toʻgʻri aloqalarni rivojlantirishni taklif qildi. Uning maʼlumotlariga koʻra, Oʻzbekistonda sohaviy platformada allaqachon 11 ming nafar yosh mutaxassis taʼlim oldi.