DXX: 2026-yilda 49 mingdan ortiq ekstremistik internet-resurs aniqlandi

DXX rahbarining soʻzlariga koʻra, 2025-yilda bunday resurslar soni 43 mingtaga yaqin boʻlgan. U ushbu bayonotni «Xavfsizlik masalalari boʻyicha SHHT plyus muloqoti» ekspertlarining birinchi uchrashuvida aytib oʻtdi. Qurbonovning fikricha, koʻrsatkichning oʻsishi radikal gʻoyalarni targʻib qilishda internetdan foydalanish kuchayganidan dalolat beradi. U, shuningdek, terrorchilik va ekstremistik tashkilotlar raqamli texnologiyalardan nima maqsadda foydalanayotganini sanab oʻtdi: mafkurani ilgari surish, oʻz safiga jalb etish, moliyalashtirish manbalarini qidirish, teraktlarga tayyorgarlik koʻrish va ularni amalga oshirish.

DXX raisining taʼkidlashicha, 2021–2026-yillarga moʻljallangan Ekstremizm va terrorizmga qarshi kurashish boʻyicha milliy strategiya amal qilgan davrda mamlakatda idoralararo va xalqaro hamkorlikni yaxshilashga erishildi. Oʻzbekiston 2026-yilgi Global terrorizm indeksida 96-oʻrinni egallab turibdi, bu terrorizmning past taʼsiri darajasiga toʻgʻri keladi.

Gazeta.uz muxbiri xabar berishicha, Qurbonov «radikallashuv bir lahzada sodir boʻlmasdan, balki murakkab ijtimoiy jarayon hisoblanadi» hamda uni oldini olish uchun faqat bloklash va kontentni oʻchirishning oʻzi yetarli emasligini taʼkidladi. Oʻzbekiston SHHT doirasida onlayn radikallashuvning oldini olish boʻyicha ilgʻor tajribalar bilan almashish imkonini beruvchi maxsus mexanizm shakllantirishni, yoshlar uchun media-savodxonlik boʻyicha raqamli taʼlim dasturlarini ishlab chiqishni, shuningdek, BMT koʻmagida terrorchilik kontentini monitoring qilish, bloklash va oʻchirish uchun vakolatli organlarning yetakchi raqamli platformalar maʼmuriyatlari bilan oʻzaro hamkorligini yoʻlga qoʻyishni taklif etdi. DXX rahbari sunʼiy intellektdan terrorchilik maqsadlarida foydalanilishiga yoʻl qoʻymaslikni hamkorlikning yana bir yoʻnalishi sifatida qayd etdi.