Samarqandda xavfsizlik boʻyicha birinchi ekspertlar «ShHT plyus muloqoti» boʻlib oʻtadi

Uchrashuv mavzusi — «Raqamli transformatsiya davrida xavfsizlik: yangi texnologiyalar rivojlanishini hisobga olgan holda terrorizm va ekstremizmga qarshi kurashish». Unda Oʻzbekiston Davlat xavfsizlik xizmati rahbari general-polkovnik B. Qurbonov raislik qiladi.

Tashkilotchilar 24 ta davlat va beshta xalqaro tuzilmadan 33 ta delegatsiyani kutmoqda. Samarqandga ShHTga aʼzo davlatlar, kuzatuvchi davlatlar va tashkilotning muloqot boʻyicha hamkorlarining maxsus xizmatlari rahbarlari va vakillari keladi. Shuningdek, xalqaro tashkilotlar va taklif etilgan mehmonlar ham ishtirok etadi.

Bunday format tashabbusi bilan Oʻzbekiston Prezidenti Shavkat Mirziyoyev chiqqan: u bu taklifni ilk bor 2024-yilda, Ostonada ShHT sammiti boʻlib oʻtgan paytda bildirgan edi. Bunday birinchi uchrashuvni Samarqandda oʻtkazish taklifi esa 2025-yilda Tyanszinda, tashkilotga aʼzo davlatlar rahbarlari yigʻilgan paytda yangragan.

Ishtirokchilar ilgʻor texnologiyalar va sunʼiy intellektning hozirgi xavfsizlik tahdidlari hamda chaqiriqlariga qanday taʼsir koʻrsatayotgani boʻyicha fikr almashishi koʻzda tutilgan. Yakunlarga koʻra, delegatsiyalar rahbarlari raqamli transformatsiya davrida xalqaro terrorizm va ekstremizmga qarshi birgalikdagi faoliyatning aniq vazifalari hamda ustuvor yoʻnalishlarini belgilab olishlari kerak.