Shavkat Mirziyoyev Buxoro viloyatiga ikki kunlik tashrifini boshladi

Matbuot xizmati maʼlumotlariga koʻra, tashrif dasturidan tarixiy merosni asrab-avaylash, turizm infratuzilmasini rivojlantirish, shuningdek, sanoat va qishloq xoʻjaligi loyihalari bilan tanishish oʻrin olgan. Prezident yangi obyektlarni ishga tushirish hamda boshqalarining qurilishini boshlash marosimlarida ishtirok etadi. Shuningdek, viloyatni kompleks rivojlantirishga bagʻishlangan yigʻilish oʻtkazilishi rejalashtirilgan.

Tashrif Kogon tumanidan boshlandi, davlat rahbari u yerda Bahouddin Naqshband maqbarasini ziyorat qildi. U yerda Qurʼon suralari oʻqilib, xalq tinchligi va farovonligi uchun duo qilindi. Bahouddin Naqshband — XIV asr ilohiyotshunos olimi, «Naqshbandiya» tasavvuf tariqati asoschisidir. Maqbara atrofidagi meʼmoriy majmua kuniga oʻrtacha 15 mingga yaqin ziyoratchini qabul qiladi va «Ipak yoʻli: Zarafshon-Qoraqum yoʻlagi» obyekti tarkibida YUNESKO Umumjahon merosi roʻyxatiga kiritilgan. Soʻnggi yillarda u yerda XV asr chizmalari asosida Doniyolbiy otaliq madrasasi va Toqi miyona darvozasi qayta tiklandi, muzey ekspozitsiyasi hamda ilmiy-tadqiqot markazi ochildi.

Ziyorat chogʻida Shavkat Mirziyoyev Buxoro asrlar davomida maʼrifatli islom taraqqiyotida muhim oʻrin tutganini, bu maʼnaviy merosni chuqur oʻrganish va yoshlar tarbiyasida foydalanish zarurligini taʼkidladi. Uning soʻzlariga koʻra, Islom sivilizatsiyasi markazi, shuningdek, Imom Buxoriy va Imom Moturidiy nomidagi majmualarning tashkil etilishi ajdodlarning ilmiy anʼanalarini davom ettirish hamda ular toʻplagan bilimlarni yosh avlodga yetkazishga qaratilgan.