Italiyada ekspertlar Markaziy Osiyo davlatlarining yaqinlashuvini muhokama qildi

«Global oʻzgarishlar sharoitida Markaziy Osiyo: oʻz strategiyalari, mintaqaviy xavfsizlik va yangi hamkorlikni shakllantirish» mavzusidagi tadbir Konrad Adenauer nomidagi jamgʻarma tomonidan tashkil etildi. Unda uch mamlakat parlamentlari, tashqi siyosat idoralari, tahliliy markazlari va media hamjamiyati vakillari ishtirok etdi.

Uchrashuv davomida Oʻzbekiston delegatsiyasi Prezident Shavkat Mirziyoyevning Fargʻona tinchlik forumini doimiy xalqaro muloqot maydoni sifatida rivojlantirish boʻyicha tashabbusini taqdim etdi. Oʻzbekiston Respublikasi Prezidenti huzuridagi Strategik va mintaqalararo tadqiqotlar instituti (SMTI) direktorining birinchi oʻrinbosari Akramjon Neʼmatovning maʼlum qilishicha, forumning navbatdagi majlisi sentabr oyi oxirida Tojikistonning Xoʻjand shahrida oʻtkazilishi rejalashtirilgan. Dastlabki yigʻilish 2025-yil 15–16-oktabr kunlari Fargʻonada 300 dan ortiq kishi ishtirokida boʻlib oʻtgan edi.

Bundan tashqari, SMTI yetakchi ilmiy xodimi Shahlo Hamraxoʻjayeva Markaziy Osiyo mintaqaviy oʻziga xosligini shakllantirish va mustahkamlash konsepsiyasi loyihasini taqdim etdi. Hujjat mintaqaning barcha beshta davlati mutaxassislari bilan birgalikda ishlab chiqilmoqda hamda har bir mamlakatning milliy suverenitetini hurmat qilgan holda gumanitar, madaniy va ijtimoiy aloqalarni mustahkamlashga qaratilgan.