Quyi palata eskrou-hisoblar bilan ulush kiritish asosidagi qurilish toʻgʻrisidagi qonun loyihasini maʼqulladi

Loyihaga koʻra, quruvchi ulushdorlarning mablagʻlarini faqat obyekt belgilangan talablar boʻyicha qurilib, foydalanishga topshirilgandan keyingina oladi. Kompaniya fuqarolarning pullarini bir qator shartlarga rioya qilgan holda toʻplashi mumkin boʻladi: Yagona axborot tizimida roʻyxatdan oʻtish, vakolatli bank bilan bosh kelishuv imzolash va loyiha deklaratsiyasini eʼlon qilish. Ulush kiritish asosida qurilishda ishtirok etish shartnomalari notarial tasdiqlanadi va davlat roʻyxatidan oʻtkaziladi. Agar quruvchi mablagʻlarni qonunni buzgan holda toʻplasa, ulushdorlar ularni foydalanganlik uchun foizlar bilan birga qaytarib berishni talab qilishga haqli. Zarurat tugʻilganda quruvchini yoki bankni almashtirish ham nazarda tutilgan.

Iyul oyidagi birinchi oʻqishdan soʻng matnga oʻzgartirishlar kiritildi. Nafaqat shartnomalarning oʻzi, balki ularga kiritiladigan oʻzgartirish va qoʻshimchalar ham notarial tasdiqlanishi kerak boʻladi. Uy-joyni topshirish muddatlari buzilgan taqdirda, olti oylik kutishlarsiz obyektni muammoli deb eʼtirof etish mumkin boʻladi, quruvchi esa kamchiliklarni bartaraf etmasdan, shunchaki kompensatsiya toʻlash orqali uni reyestrdan chiqara olmaydi. 10 dan ortiq havola qiluvchi normalar boʻyicha qonunosti hujjatlarini tayyorlash muddatlari belgilandi.

Yangi qoidalar qonun kuchga kirgandan soʻng qurilishga ruxsatnoma beriladigan obyektlarga taalluqli boʻladi. Iyul oyidagi muhokamada Adliya vazirligining Iqtisodiy qonunchilik boshqarmasi boshligʻi Jamshid Mirzayev ilmiy tashkilotlar qurilish tannarxi oshishi xavfini tan olganini maʼlum qildi va qoʻshimcha qildi: «Ha, kelajakda uy-joy narxi oshadi, ammo fuqaro kvartirani ololmaydigan taqdirda, bemalol bankka borib, oʻz pullarini qaytarib olishi mumkin boʻladi».