Prezident qarorida Nukusda yangi Nukus City tumani koʻzda tutilgan

Tuman Jolshilar mahallasida joylashtiriladi. Bosh reja «Yangi Toshkent» tajribasi va xorijiy tashkilotlarning tavsiyalari hisobga olingan holda, zamonaviy meʼmoriy yechimlar hamda energiya tejovchi texnologiyalar bilan tayyorlanadi. U yerda «aqlli shahar» elementlariga ega koʻp kvartirali uylar, savdo va biznes markazlari, mehmonxonalar, sport maydonchalari, bogʻlar, yashil hududlar, favvoralar va ijtimoiy obyektlar koʻzda tutilgan. Qurilish muddatlari va loyiha qiymatiga aniqlik kiritilmagan, deb qayd etadi Anhor.uz.

Hujjat shuningdek, respublikaning 2027-yilga moʻljallangan iqtisodiy maqsadlarini ham belgilab beradi: YaHM 8 foizga, sanoat — 7 foizga, bozor xizmatlari — 17 foizga, qishloq xoʻjaligi mahsulotlarini ishlab chiqarish — 5 foizga, qurilish ishlari — 13 foizga oʻsishi kerak. Eksportni 550 mln dollarga yetkazish, investitsiyalar hajmini esa ikki baravarga, yaʼni 5 mlrd dollargacha oshirish rejalashtirilgan. Birinchi bosqichda 125 ming kam taʼminlangan oilaning 513 ming aʼzosini yuqori daromadli ish bilan taʼminlash koʻzda tutilmoqda.

2026-yil 15-noyabrdan Qoraqalpogʻistonda Uzagrostar xoldingi tizimida «Boʻzatov agrostar» kompaniyasi tashkil etiladi. U choʻl va yaylov oʻsimliklari urugʻlarini donadorlashtiradi (granulalaydi) hamda kapsulalaydi va ularni dronlar yordamida ekadi; buning uchun 10 ta dron va ikkita granulyator sotib olinadi. 2030-yil oxiriga qadar shu usulda 100 ming gektar maydonga urugʻ ekish rejalashtirilmoqda.

2022-yil 1-yanvardan 2023-yil 15-aprelgacha boʻlgan davrda elektron savdolarda yer uchastkalarini olgan ayrim yer ijarachilariga foizsiz uch yillik toʻlovlarni boʻlib-boʻlib toʻlashga ruxsat beriladi.