Nurafshondagi Kelajak texnologiyalari markazi kompaniyalariga IT Park imtiyozlari beriladi

Robotlar, elektronika va texnologik uskunalar ishlab chiqarish uchun xomashyo va butlovchi qismlar import bojlardan ozod qilinadi, ushbu sohalardagi ilmiy ishlanmalardan olinadigan daromadlarga esa soliq solinmaydi. Markaz kompaniyalari aynan qanday imtiyozlarga ega boʻlishi, ularni qoʻllash tartibi va qaysi muddatdan amal qilishi hozircha ochiqlanmagan, deb qayd etadi Gazeta.uz.

Tadqiqotchilar va ularning ishlanmalariga qiziqqan korxonalarni bogʻlashi lozim boʻlgan «Yangi sanoat» milliy platformasini ishlab chiqish koʻzda tutilgan. 2027-yil 1-maygacha har bir hududda bittadan R&D markazi yoki texnoparkni yangi sanoat yoʻnalishlariga moslashtirish va ularning bazasida mahsulotlarni sinash maydonchalarini ochish topshirildi. Robototexnikani rivojlantirish toʻgʻrisidagi qaror loyihasi ikki hafta ichida, texnologik uskunalar va elektronika ishlab chiqarishni qoʻllab-quvvatlash boʻyicha kompleks dastur esa 2027-yil 1-martgacha tayyorlanishi kerak.

Yuqori qoʻshilgan qiymatga ega loyihalar qatorida — Toshkentda serverlar, sensorli datchiklar va interaktiv panellar, Andijonda ofis texnikasi va tayyor kabel yigʻmalari, Qashqadaryoda televizorlar uchun elektron platalar ishlab chiqarish bor. 2027-yildan «1000 nafar muhandis-konstruktor» dasturi boshlanadi: mahalliy mutaxassislar xorijga yuboriladi, ular Janubiy Koreya, Yaponiya, Xitoy, Turkiya va Yevropa mamlakatlarida malaka oshiradi.

Markaz qurilishi 2026-yil 22-iyul kuni boshlangan edi. Oʻshanda maydoni 36 gektar boʻlgan majmuaga 500 mln dollarga yaqin investitsiya jalb etish rejalashtirilayotgani, Prezident matbuot xizmati maʼlumotlariga koʻra esa loyiha 5000 dan ortiq yuqori malakali ish oʻrni yaratishi kerakligi xabar qilingan edi.