Oʻzbekistonda davlat xaridlarida mahsulotning butun xizmat muddati davomidagi xarajatlari hisobga olinadi

Yangi yondashuv «life cost» nomini oldi. Buyurtmachi nafaqat xaridning dastlabki narxini, balki mahsulotning butun xizmat muddati davomida elektr energiyasi, taʼmirlash, servis va foydalanish xarajatlarini ham hisobga oladi. Uchrashuvda tovarni faqat eng past narx boʻyicha tanlash amaliyotini qayta koʻrib chiqish zarurligi taʼkidlandi: arzon importdan foydalanishning keyingi xarajatlari mahalliy mahsulotlarga qaraganda ancha yuqori boʻlib chiqishi mumkin.

Misol tariqasida 40 kilovatt quvvatga ega ikkita transformatorning nazorat xaridi keltirildi. Import qilingani mahalliyga qaraganda 400 ming soʻmga arzonroq tushgan, biroq 10 foiz koʻproq elektr energiyasi isteʼmol qilgan, xizmat koʻrsatish davridagi taʼmirlash esa toʻrt baravar qimmatga tushgan.

Davlat xaridlari orqali mamlakat har yili 10 trln soʻmlik elektrotexnika mahsulotlarini xarid qiladi. Ilgari tadbirkorlar davlat korxonalari buyurtmalarini toʻrt-beshta alohida platformada kuzatishlariga toʻgʻri kelardi, endi barcha davlat buyurtmalari bittasida jamlandi. 2027-yil 1-yanvardan davlat xaridlarining uch yillik rejalarini oldindan eʼlon qilish boshlanadi. Matbuot kotibining xabar berishicha, bu biznesga talabni oldindan baholash, ishlab chiqarishni kengaytirish, uskunalarni sotib olish va investorlarni jalb qilish imkonini beradi.

Shuningdek, uchrashuvda mahalliy elektrotexnika korxonalarining xalqaro moliya institutlari bilan hamkorligini kengaytirish masalasi muhokama qilindi.