Saida Mirziyoyeva JST bosh direktori Ngozi Okonjo-Iveala bilan uchrashdi

Muloqot chogʻida Oʻzbekistonning tashkilotga qoʻshilish jarayoni va mamlakat oldida turgan yakuniy vazifalar muhokama qilindi. Saida Mirziyoyeva JST rahbariga uzluksiz ekspertlik koʻmagi uchun minnatdorlik bildirdi hamda yoʻlning katta qismi bosib oʻtilganini qayd etib, jarayonni yakunlash uchun surʼatni saqlab qolish muhimligini taʼkidladi.

Bir qator idoralar tomonidan eʼlon qilingan rasmiy maʼlumotlarga koʻra, respublikaning JSTga aʼzo boʻlishi boʻyicha muzokaralar jarayoni 2023-yildan buyon faollashdi. 2026-yil iyul oyiga kelib Oʻzbekistonning tashkilotga aʼzo boʻlishi boʻyicha ishchi guruhining 13 ta yigʻilishi boʻlib oʻtdi.

Hozirgi vaqtga qadar bozorlarni ochish boʻyicha JSTga aʼzo 35 ta davlat bilan muzokaralar boshlangan boʻlib, ulardan 33 ta davlat bilan allaqachon yakunlangan. Bundan tashqari, milliy qonunchilikning 200 ga yaqin hujjati tashkilot qoidalari va tamoyillariga muvofiqlashtirildi.