Oʻzbekistonda yirik kompaniyalar uchun elektr energiyasining tabaqalashtirilgan tariflari oʻzgartirildi

Elektr energiyasi va tabiiy gazdan foydalanish qoidalariga kiritilgan oʻzgartirishlarga koʻra, soat 09:00 dan 17:00 gacha boʻlgan yarim tigʻiz kunduzgi soatlarda tarif 1,5 baravarga kamaytiriladi, 22:00 dan 06:00 gacha boʻlgan tungi soatlarda esa isteʼmolchilar chegirmasiz, odatiy belgilangan tarif boʻyicha toʻlov qiladilar. Eng yuqori yuklamali tigʻiz soatlarda (06:00 dan 09:00 gacha va 17:00 dan 22:00 gacha) 1,5 oshiruvchi koeffitsiyent oʻzgarishsiz qoladi.

I tarif guruhiga ulangan umumiy quvvati 750 kVA va undan yuqori boʻlgan korxonalar kiradi. 1-iyundan ushbu toifa uchun bazaviy tarif QQS bilan 1 kVt·soat uchun 1100 soʻmni tashkil etadi. Shunga koʻra, tigʻiz soatlarda narx 1650 soʻmga yetadi, yarim tigʻiz soatlarda pasaytiruvchi koeffitsiyent bilan esa 1 kVt·soat uchun qariyb 733 soʻmni tashkil etadi.

Bundan tashqari, hujjat tadbirkorlar uchun EHNAT va GHNAT orqali hisobga olish talablari bajarilganda, masofadan boshqariladigan hisoblagichlar oʻrnatilganda, toʻlovlar ikki oy davomida oʻz vaqtida amalga oshirilganda va qoidabuzarliklar boʻlmaganda yoqilgʻi-energiya resurslarining «namunali isteʼmolchisi» maqomini joriy etadi. Bunday korxonalar gaz va elektr energiyasi uchun oylik boʻnakni 100% oʻrniga 15% miqdorida toʻlashlari mumkin boʻladi. Shuningdek, qarzdorlik sababli tarmoqdan uzilgandan soʻng gaz tarmoqlariga qayta ulanish uchun toʻlov bekor qilinadi.