Andijon tumanida 20 million dollarlik kichik GES uskunalari zavodi qurilmoqda

Loyiha Prezidentning 2025-yil 28-martdagi qarori asosida Andijan Jinlun Yangi Energiya kompaniyasi tomonidan toʻliq xorijiy investitsiyalar hisobidan amalga oshirilmoqda. Toʻliq loyiha quvvatiga erishish 2027-yilga moʻljallangan. Loyiha doirasida 200 ta ish oʻrni yaratilishi koʻzda tutilgan.

Korxona rejalashtirilgan koʻrsatkichlarga erishgach, har yili umumiy qiymati 70 milliard soʻm boʻlgan 100 ta kichik gidroelektr stansiyalari majmuasini ishlab chiqarishni rejalashtirmoqda. Bundan tashqari, zavod mikrogidroenergetika uskunalari, dastgohlar va elektrotexnika mahsulotlarini ishlab chiqaradi. Mahsulotlarning bir qismini Qozogʻiston, Qirgʻiziston va Tojikistonga eksport qilish, yillik xorijiy yetkazib berish hajmini 3 million dollarga yetkazish rejalashtirilgan.

Korxona, shuningdek, Andijon viloyatida bir nechta mikroGES qurish niyatida. Xususan, stansiyalarni joylashtirish uchun Katta Fargʻona kanalining barqaror suv oqimi koʻrib chiqilmoqda.

Spot.uz nashrining Korxona va tashkilotlarning yagona davlat registridan olgan maʼlumotlariga koʻra, Andijan Jinlun Yangi Energiya kompaniyasi 2024-yil avgust oyida 15,74 milliard soʻmlik ustav fondi bilan tashkil etilgan. Uning yagona taʼsischisi Singapore Jinlun International Investment Pte. Ltd. hisoblanadi, rahbari sifatida esa Xun Uyan koʻrsatilgan.