Oʻzbekistonda elektr stansiyalari quvvatini 2030-yilga borib 46,1 GVtga yetkazish rejalashtirilmoqda

Taqdim etilgan rejaga koʻra, 2030-yilga borib mamlakatda elektr energiyasi ishlab chiqarish yiliga qariyb 129 mlrd kVt·soatga yetishi, 2035-yilga kelib esa generatsiya quvvatlarini yillik ishlab chiqarish hajmi 154,7 mlrd kVt·soat boʻlgan 57,2 GVtga yetkazish koʻzda tutilgan. Hozirda quyosh va shamol elektr stansiyalarining umumiy quvvati 6,3 GVt dan oshdi, gidroelektr stansiyalar soni esa umumiy quvvati qariyb 2,5 GVt boʻlgan 100 tadan oshdi. Faqat sanoatning oʻzida elektr energiyasi isteʼmoli 2030-yilga borib 38 dan 53,5 mlrd kVt·soatgacha oʻsishi prognoz qilinmoqda.

Yangi quvvatlarni integratsiya qilish uchun 2030-yilgacha qariyb 5 ming kilometr yangi elektr uzatish tarmoqlari, toʻqqizta 220 kV kuchlanishli va yettita 500 kV kuchlanishli podstansiyalar qurish rejalashtirilgan boʻlib, ularning bir qismini ishga tushirish 2027–2029-yillarga moʻljallangan. Shuningdek, tarmoqda umumiy quvvati 4,2 GVt boʻlgan energiyani saqlash tizimlarining 26 ta loyihasi shakllantirilgan, ulardan 17 tasi amalga oshirish bosqichida turibdi. Qoraqalpogʻistonda 220 kV kuchlanishli podstansiya va elektr uzatish tarmogʻini qurish orqali shamol stansiyalarini 1 GVt quvvatga ega maʼlumotlar markazlari (data-markazlar) bilan bogʻlash taklif etildi.

Bundan tashqari, investitsiyalar bilan ishlashning yangi sxemasi taqdim etildi. Loyihalarni talab prognozlaridan kelib chiqqan holda, oldindan ajratilgan yer uchastkasi va tarmoqlarga ulanish nuqtasi bilan shakllantirish, investorlarni esa ochiq raqobatli tanlov orqali aniqlashga qaror qilindi. Iqtisodiyot va moliya vazirligi talabni prognozlash bilan, Energetika vazirligi strategik rejalashtirish va texnik siyosat bilan, Energetika bozorini rivojlantirish va tartibga solish agentligi esa bozor munosabatlari va tariflar bilan shugʻullanadi.