Markirovkalanishi lozim boʻlgan tovarlar uchun 84 ta umumiy MXIK kodi 11-dekabrdan faol boʻlmagan maqomga oʻtadi

Oʻzgarishlar tasnif.soliq.uz portalidagi Tovarlarning yagona elektron milliy katalogidagi kodlarga tegishli. Markirovkalanishi lozim boʻlgan mahsulotlarning har bir turi uchun alohida MXIK kodidan foydalanish majburiyati Vazirlar Mahkamasining 2020-yil 30-dekabrdagi 833-son qarori bilan mustahkamlangan. Idora maʼlumotlariga koʻra, mazkur chora bunday tovarlar aylanmasi ustidan nazoratni yaxshilashga qaratilgan.

Soliq organlari ishlab chiqaruvchilar, import qiluvchilar, ulgurji va chakana sotuvchilarga oʻzlari qoʻllayotgan kodlarni tekshirishni hamda umumiy kodlarni batafsillashtirilganlariga almashtirishni tavsiya qilmoqda. Agar katalogda mos kod mavjud boʻlmasa, uni yaratish boʻyicha arizani oʻsha sayt orqali yuborish mumkin, koʻrib chiqish muddati uch ish kunini tashkil etadi. Kodlarni yaratish tartibi Vazirlar Mahkamasining 2025-yil 28-apreldagi 263-son qarori bilan belgilanadi. Ushbu kodlar elektron hisobvaraq-fakturalarda va markirovkalanishi lozim boʻlgan tovarlar uchun onlayn-NKT cheklarida koʻrsatiladi.

Bir necha kun oldin, 9-noyabr kuni Soliq qoʻmitasi onlayn-kassalar markirovka kodlarini qay tarzda tekshirishi haqida soʻzlab bergan edi. Agar kod skanerlanmasa, chek rasmiylashtirilmaydi. Shuningdek, kod allaqachon ishlatilgan va muomaladan chiqarilgan boʻlsa yoki tovarning yaroqlilik muddati oʻtgan boʻlsa, sotuv bloklanadi. Bundan tashqari, tizim sotuvchiga kelib tushgani haqida maʼlumot mavjud boʻlmagan markirovkalangan tovarlar sotuvini aniqlaydi; bunday tadbirkorlarga qoidabuzarliklarni bartaraf etish talabi bilan rasmiy bildirishnomalar yuboriladi.