Nvidia direktorlar kengashi Jensen Xuangga nisbatan tekshiruv boshladi

Tekshiruv The New York Timesʼning oktabr oyidagi nashridan soʻng boshlandi. Gazeta Xuangning Singapurning Megaspeed kompaniyasi sobiq rahbari bilan yaqin munosabatlari haqida yozgan edi; nashr maʼlumotlariga koʻra, AQSH rasmiylari tadbirkor ayolning oʻzini Xitoy razvedkasi bilan bogʻlaydi. Familiyalari bir xil boʻlishiga qaramay, ular qarindosh emas. Megaspeed Nvidiaʼdan sunʼiy intellekt uchun chiplar sotib oladi. AQSH rasmiylari avvalroq ushbu kompaniyani AQSHning eksport cheklovlarini chetlab oʻtib, Xitoyga ilgʻor texnologiyalarni yetkazib berishga yordam berganlikda gumon qilgan, Megaspeedʼning oʻzi esa qoidabuzarliklarni rad etadi.

Surishtiruvni mustaqil direktorlar qoʻmitasi olib bormoqda, unga tashqi yuristlar jalb etilgan. Nvidia hozircha kompaniyaning maxfiy maʼlumotlari yoki AQSH milliy xavfsizligi xavf ostida qolgan deb hisoblash uchun asoslar koʻrmayotganini bildirdi. Direktorlar kengashi Xuangga ishonch bildirdi, u kompaniyani boshqarishda davom etadi. 8-noyabr sanasi bilan berilgan murojaatida Xuang oilasi, hamkasblari, hamkorlari va aksiyadorlaridan uzr soʻradi hamda tekshiruvga koʻmaklashishga vaʼda berdi. Oktabr oyi oxirida u Bloombergʼga Megaspeed sobiq rahbari bilan aloqalari oddiy ish yuzasidan boʻlgani va ushbu kompaniya faoliyatiga taalluqli ekanini aytgan edi.

AQSH Vakillar palatasining uchta qoʻmitasi raislari Brayan Mast, Jon Mulenaar va Rik Krouford Xuangga 18-noyabr kuni yopiq brifing oʻtkazishni taklif qildi. Unda ishtirok etishni tasdiqlash yoki boshqa sanani bildirish undan 11-noyabrgacha soʻralgan. Qonunchilarning soʻzlariga koʻra, eʼlon qilingan maʼlumotlar «milliy xavfsizlik sohasida jiddiy xavotirlar uygʻotmoqda». AQSH prezidenti Donald Tramp 8-noyabr kuni ushbu ayblovlarni Xuang bilan muhokama qilmaganini aytdi.