Toshkentdagi Davlat aktivlari agentligi binosi 251,6 mlrd soʻmga sotildi

Boshlangʻich narx 165,5 mlrd soʻmni tashkil etgan boʻlib, savdolar davomida u 86,1 mlrd soʻmga, yaʼni 52 foizga oshdi. «Jarkurgan Build Group» MChJ gʻolib boʻldi. Spot.uz aniqlik kiritishicha, auksion soat 10:00 da boshlanib, 2 soat 50 daqiqa davom etgan va ishtirokchilar 52 ta taklif bildirgan. Obyekt ochiq savdolarga ilk bor 2025-yilda chiqarilgan edi.

Toʻrt qavatli bino Amir Temur shohkoʻchasi va Buxoro koʻchasi kesishmasida joylashgan boʻlib, avval unda Toshkent shahar hokimligi faoliyat yuritgan. Ichki hovli bilan birga yer maydoni 0,66 gektarni, xonalarning umumiy maydoni esa 11 ming kvadrat metrni tashkil qiladi. Sotuv Vazirlar Mahkamasining 2025-yil mart oyidagi qaroriga muvofiq amalga oshirilmoqda, yangi mulkdor u yerda ofislar yoki xizmat koʻrsatish sohasidagi biznesni joylashtirishi mumkin.

KTYAD maʼlumotlariga koʻra, xaridor 2024-yil avgust oyida poytaxtda roʻyxatdan oʻtgan, uy-joy qurilishi bilan shugʻullanadi, uning ustav fondi — 28,6 mlrd soʻm. 61,51% ulush «Palace of Energy» firmasiga tegishli (uning yagona egasi sifatida Jahongir Toshpoʻlatov koʻrsatilgan), qolgan 38,49% esa Dilmurod Siddiqovga tegishli.

Bitim vazirlik va idoralarning Yangi Toshkentga koʻchirilishi dasturi doirasida amalga oshirilmoqda, mazkur dastur poytaxtdagi 83 ta obyektni sotishni nazarda tutadi. Agentlik maʼlumotlariga koʻra, umumiy qiymati 1 120,4 mlrd soʻmlik sakkizta maʼmuriy bino sotib boʻlingan, umumiy boshlangʻich narxi qariyb 1 trln soʻm boʻlgan yana 11 ta obyekt savdoga chiqarilgan. Avvalroq Investitsiyalar, sanoat va savdo vazirligi binosi auksionda 287,14 mlrd soʻmga sotilgan edi.