Yandex Go 10-noyabr kuni Market vitrinasini yopadi

Marketʼda buyurtmani 10-noyabrgacha rasmiylashtirish mumkin, foydalanuvchilar ushbu sanagacha buyurtma berishga ulgurgan barcha tovarlar qayta ishlanadi va yetkazib beriladi. Oziq-ovqat, elektronika, kosmetika, uy-roʻzgʻor buyumlari va boshqa toifalarni Yandex Goʼda avvalgidek 15 daqiqadan boshlanadigan yetkazib berish muddati bilan buyurtma qilish mumkin boʻladi. Kompaniyada tez yetkazib berishdan manfaatdor boʻlgan Market hamkorlariga Doʻkonlar yoki Lavka bilan hamkorlik qilish imkoniyatini koʻrib chiqish taklif etildi.

Yandex Uzbekistan maʼlumotlariga koʻra, oxirgi bir yil ichida Doʻkonlar hamkorlari soni deyarli ikki baravar koʻpayib, 500 taga yetdi, Lavkaʼda oʻnta darkstor mavjud, xususiy savdo belgisi esa 100 dan ortiq nomdagi mahsulotlarni oʻz ichiga oladi. Kompaniyaning taʼkidlashicha, Doʻkonlar va Lavkaʼdagi buyurtmalar soni 2026-yilda 2025-yildagiga qaraganda allaqachon uch baravar koʻp boʻldi.

Bundan tashqari, Yandex Uzbekistan 2026-yil oxirigacha Toshkentda hozirda sinovdan oʻtayotgan robotlar orqali yetkazib berishni yoʻlga qoʻyishni rejalashtirmoqda. «Yetkazib berishni yil oxirigacha ishga tushirishga umid qilamiz», — dedi Izzat Shukurov Kun.uzʼga. Robotlar ikki kilometrgacha boʻlgan masofaga moʻljallangan, piyodalar tezligida harakatlanadi, lidar va ultratovushli datchiklar yordamida yoʻnalish oladi, yomgʻirda harakatlanish hamda balandligi 10 santimetrgacha boʻlgan yoʻl chetidagi toʻsiqlardan (bordyurlardan) oʻtish qobiliyatiga ega. Ular oziq-ovqat, tayyor taomlar va kundalik tovarlarni tashiydi. Sinov loyihasidan soʻng kompaniya robotlarni ekotizimning boshqa xizmatlariga ulashni va robot orqali yetkazib berishni boshqa kompaniyalarga taklif qilishni rejalashtirmoqda.