«Oʻzbekneftgaz» 1,1 mlrd dollarlik kreditlarni qayta moliyalashtirish boʻyicha muzokaralar olib bormoqda

Ushbu summaning 840 mln dollari Uzbekistan GTL kreditlariga, qolgan 260 mln dollari esa xoldingning oʻz qarzdorliklariga toʻgʻri keladi. Shu bilan birga, kompaniya avval olingan moliyalashtirish shartlarini ham oʻzgartirmoqda. Toʻqqizta bankdagi umumiy hajmi 384 mln dollar boʻlgan yuqori stavkali 41 ta kredit boʻyicha stavkalar pasaytirildi, foizlar boʻyicha tejamkorlik qariyb 18 mln dollarni tashkil etdi. Kompaniya maʼlumotlariga koʻra, ilgari u Oʻzbekiston tijorat banklaridan oʻrtacha yillik 9,5–12 foiz stavkada qarz olgan boʻlsa, endi bu koʻrsatkich 7,4–7,5 foizni tashkil etmoqda.

30-sentabr holatiga koʻra, guruhning qarzdorligi yil boshidagiga nisbatan 417 mln dollarga kam boʻlgan. Dastlabki hisob-kitoblarga koʻra, kredit yuki koeffitsiyenti 2025-yil boshidagi 3,1 ga nisbatan 2,2 gacha tushgan, dedi Hamrayev.

2026-yilning yanvar–sentabr oylarida «Oʻzbekneftgaz» tizimidagi tashkilotlar bilan birgalikda 42 trln soʻmlik sanoat mahsulotlari ishlab chiqargan: reja 105,7 foizga bajarilgan, oʻsish 6 foizni tashkil etgan. Eksport 737 mln dollarga (rejaning 151 foizi), investitsiyalar 790 mln dollarga (101 foiz) yetgan. Kompaniyaning oʻz sof foydasi 2,9 trln soʻmni, Uzbekistan GTL sof foydasi 3,1 trln soʻmni (bir yil oldingiga nisbatan 24 foiz koʻp), Buxoro neftni qayta ishlash zavodining sof foydasi 1,9 trln soʻmni, Shoʻrtan gaz-kimyo majmuasiniki esa 1,1 trln soʻmni tashkil etgan. Guruh byudjetga 6,9 trln soʻm oʻtkazgan boʻlib, bu oʻtgan yilgi koʻrsatkichdan 25 foizga koʻpdir.

Toʻqqiz oy davomida xarajatlar yillik 2,3 trln soʻmlik reja sharoitida 1,9 trln soʻmga qisqartirilgan, tovar-moddiy resurslarni xarid qilishda 800 mlrd soʻmdan ortiq mablagʻ tejalgan. Xodimlar soni qisqargan bir sharoitda amaldagi xodimlarning mehnatga haq toʻlash jamgʻarmasi 21 foizga oshgan; kompaniyada buni yil boshidan buyon maoshlarning ikki marta oshirilgani bilan bogʻlashdi.