ADM Jizzakh DK&G bilan gibridlar va elektromobillar sexi boʻyicha kelishuv tuzdi

Kompaniya maʼlumotlariga koʻra, sex qurilishiga 100 mln dollargacha sarmoya kiritiladi (UzDaily nashri ADM Globalʼga tayanib, 100 mln atrofidagi summani keltirgan). Yangi ishlab chiqarish majmuasi ADM Jizzakh hududida allaqachon barpo etilmoqda. U yerda Changan gibridlari va elektromobillari, birinchi navbatda UNI-E, shuningdek, Chery va Haval markali mashinalarni yigʻish rejalashtirilgan.

CKD texnologiyasi boʻyicha yigʻish toʻliq siklni qamrab oladi: kuzovni payvandlash va boʻyash, yakuniy yigʻuv hamda tayyor mashina sifatini tekshirish. Hozirda bunday sxema boʻyicha ADM Jizzakhʼda ichki yonuv dvigateliga ega Kia modellari chiqarilmoqda; UzDaily yozishicha, DK&G ushbu ishlab chiqarishni jihozlashda ham ishtirok etgan. Kompaniya bitta konveyerda bir nechta markadagi avtomobillarni yigʻish imkoniyatini yangi majmuaning oʻziga xos jihati deb atamoqda, bu yechimni ikki kompaniya muhandislari birgalikda ishlab chiqadi. Mahsulotni ichki bozorga va chet elga yetkazib berish koʻzda tutilgan.

ADM Global Oʻzbekistonda mahalliylashtirish darajasi yuqori boʻlgan bir nechta gibrid va elektromobil modellarini taqdim etishni hamda mahalliy butlovchi qismlar ulushini bosqichma-bosqich oshirib borishni rejalashtirmoqda. ADM Global bosh direktori Daniyar Davletiyarov «avtomobilsozlik, butlovchi qismlar ishlab chiqarish, xususiy muhandislik kompetensiyalarini rivojlantirish va ilgʻor texnologiyalarni joriy etishni birlashtiruvchi zamonaviy industrial ekotizimni» shakllantirishni kompaniyaning vazifasi deb atadi.