Raqobat qoʻmitasi Uklonʼni taksi bozorida ustun mavqega ega deb tan oldi

Ushbu maqom «yoʻlovchilarni tashish (taksi) buyurtmalarini joylashtirish va taksi xizmatlarini koʻrsatish boʻyicha vositachilik (agregatorlik) xizmatlari» bozoriga tegishli. Suiisteʼmolliklarning oldini olish maqsadida qoʻmita kompaniya faoliyatiga monopoliyaga qarshi komplayens tizimini joriy etadi va monitoring olib boradi.

2024-yil oktabr oyida xuddi shunday maqomni YandexGo UB, Yandex Eats va Express24 APP olgan edi. Agar platformaning tushumi bazaviy hisoblash miqdorining 100 ming baravaridan (44 mlrd soʻm) oshsa, oylik faol yakuniy foydalanuvchilari soni 50 mingdan yoki biznes-foydalanuvchilari soni 3 ming va undan koʻp boʻlsa, shuningdek, uning muayyan bozordagi ulushi 40% dan yuqori boʻlsa, platforma ustun mavqega ega deb tan olinadi.

Bunday maqomga ega operatorlarga raqobatni cheklovchi yoki foydalanuvchilarning huquq va manfaatlarini buzuvchi 20 dan ortiq turdagi harakatlar taqiqlanadi. Qoidabuzarliklar uchun aylanmaning 5% miqdorida jarima nazarda tutilgan, kompaniyaning mansabdor shaxslari esa maʼmuriy javobgarlikka tortilishi mumkin.

Uklon Toshkentda 2023-yil iyun oyida ish boshlagan. Oktabr oʻrtalarida qoʻmita taksi agregatorlari bozoridagi holat va ularning narxlarini oʻrganishini eʼlon qildi: idora Yandex Goʼdagi texnik nosozliklar fonida tigʻiz soatlarda tariflarning oshishiga eʼtibor qaratdi.