Fitch «Oʻzbekgidroenergo» reytingini BB darajasida qoldirdi, prognoz — «Barqaror»

Fitch prognozning oʻzgarishini davlat bilan bogʻliq tashkilotlar baholanadigan metodologiyaning qayta koʻrib chiqilishi bilan izohlamoqda. Agentlik kompaniya qarzining davlat kafolatlari ostidagi ulushi bosqichma-bosqich kamayishini kutayotgani sababli uning reytingini Oʻzbekistonning suveren reytingiga avtomatik ravishda bogʻlashni toʻxtatadi. Fitch prognoziga koʻra, 2026–2028-yillarda qarzning qariyb 75 foizi ular bilan taʼminlangan boʻladi. Shu bilan birga, agentlik davlat tomonidan qoʻllab-quvvatlanish bahosini 20 balldan 30 ballgacha oshirdi.

Mustaqil kredit profili b+ darajasida qoldi. Mamlakatdagi operatsion muhit hisobga olinmaganda, u bb- darajasiga, yaʼni bir pogʻona yuqoriga toʻgʻri kelar edi. Fitch «Oʻzbekgidroenergo»ning mamlakat gidroenergetikasidagi monopol mavqeyini, yuqori operatsion rentabelligini, faoliyatining kengayishini va qarzning oqilona boshqarilishini uning kuchli tomonlari qatoriga kiritadi. Tariflarni tartibga solishning yetarlicha prognoz qilib boʻlmasligi va Oʻzbekistondagi operatsion muhit bahosi profilni cheklab turibdi.

Investitsiya rejalariga koʻra, kompaniyaning kapital xarajatlari 2024–2026-yillardagi taxminan 2,4 trln soʻmga (qariyb 200 mln dollar) nisbatan 2027–2029-yillarda yiliga oʻrtacha 3,7 trln soʻmni (qariyb 310 mln dollar) tashkil etishi mumkin. Kompaniya sof qarzning EBITDAʼga nisbatini 3,0x atrofida, 3,5xʼdan yuqori boʻlmagan darajada saqlab turish niyatida. Agentlik 2026–2029-yillarda manfiy sof pul oqimini prognoz qilmoqda va valyuta xatariga eʼtibor qaratmoqda: qarz deyarli toʻliq xorijiy valyutada, tushumning asosiy qismi soʻmda shakllanadi, xedjirlash esa qoʻllanilmaydi.