«Rosatom» Nurlikon maʼdanidan litiy olish texnologiyasini ishlab chiqdi

Ishlab chiquvchilarning maʼlumotlariga koʻra, yangi texnologiya tayyor mahsulotga litiyning 94,44 foizini ajratib olish imkonini beradi. Nurlikon maʼdani tarkibida 0,5 foizga yaqin litiy oksidi mavjud. Anʼanaviy boyitish usuli unga toʻgʻri kelmaydi: foydali mineral va uni oʻrab turgan togʻ jinsi xususiyatlari boʻyicha bir-biriga juda yaqin, karbonatlarning koʻp miqdori esa qayta ishlashni yanada qiyinlashtiradi.

Zanjirning oraliq bosqichlaridan birida Olmaliq kimyo zavodi chiqindisi hisoblangan fosfogips xomashyo boʻlib xizmat qiladi. Buning sharofati bilan har yili 225 ming tonnaga yaqin fosfogipsni qayta ishlash mumkin boʻladi. Qayta ishlash jarayonida suyuq va qattiq chiqindilar hosil boʻlmaydi, boyitish qoldiqlarini esa sement sanoati uchun xomashyo sifatida ishlatish koʻzda tutilmoqda.

«Giredmet» AJ texnik boʻlimi boshligʻi Valeriy Golovkoning aytishicha, loyiha quvvati yiliga 750 ming tonna maʼdanni tashkil etadi, bu esa har yili «XCh» markali 8,5 ming tonnadan ortiq yuqori tozalikdagi litiy karbonat ishlab chiqarish imkonini beradi. U chiqindilardan voz kechilishini shunday izohladi: «kambagʻal slyudali maʼdanlar uchun bu shunchaki ekologik talab emas, balki iqtisodiy zaruratdir». Kelgusi yilda tajriba-sanoat sinovlari rejalashtirilgan boʻlib, ularning yakunlari boʻyicha texnologiyani sanoat miqyosida qoʻllashga tayyorlash koʻzda tutilgan.