AQSHdagi biznes-missiya yakunlari boʻyicha Oʻzbekiston tovarlari shourumi va ombori ochildi

Missiya 27-oktabrdan 3-noyabrgacha boʻlib oʻtdi. U Investitsiyalar, sanoat va savdo vazirligi koʻmagida ikki davlat oʻrtasidagi savdo-iqtisodiy hamkorlikni kengaytirish hamda Amerika bozorida Oʻzbekiston tovarlarini ilgari surish maqsadida Business Diplomat kompaniyasi bilan hamkorlikda tashkil etildi. Delegatsiya Nyu-York, Vashington va Kaliforniyada boʻldi.

Nyu-Yorkda ishtirokchilar UZBEX elektron platformasining taqdimotini oʻtkazdilar. Vashingtonda delegatsiya AQSHning Xalqaro taraqqiyot moliya korporatsiyasi (DFC), Tijorat huquqini rivojlantirish dasturi (CLDP) va White & Case yuridik firmasi vakillari bilan uchrashdi. Uchrashuvlarda eksportni oshirish, investitsiyalarni jalb qilish va ishbilarmonlik aloqalarini rivojlantirish masalalari muhokama qilindi. Kaliforniyada tadbirkorlar Amazon korporatsiyasi logistikasi qanday tashkil etilgani bilan tanishdilar.

Yangi obyektlar Oʻzbekiston tovarlarini AQSHdagi xaridorlarga namoyish etish, ularni saqlash va keyinchalik yetkazib berish uchun moʻljallangan. Vazirlik shourum va ombor aynan qayerda joylashgani, ularning sigʻimi qandayligi hamda u yerda qaysi mahsulotlar taqdim etilganiga aniqlik kiritmadi. Imzolangan eksport shartnomalari va rejalashtirilayotgan yetkazib berish hajmlari haqida hozircha maʼlumot yoʻq.