Toshkentda yer qazish ishlariga onlayn ruxsatnoma berish yoʻlga qoʻyildi

order.tashkent.uz veb-portali orqali jismoniy va yuridik shaxslar yer qazish ishlari, muhandislik tarmoqlarini yotqizish hamda koʻchalar yoki ularning ayrim qismlarini vaqtincha toʻsish boʻyicha soʻrovlar yuborishlari mumkin.

Idora bayonotiga koʻra, platforma qazish ishlarini oldindan rejalashtirish, ularni masʼul tashkilotlar bilan kelishish va xavfsiz bajarish maqsadida joriy etildi. Markaz kelishilmagan ishlar tirbandliklarga, yerosti tarmoqlarining shikastlanishiga, piyodalar uchun toʻsiqlarga hamda kommunal taʼminotda uzilishlarga olib kelishi mumkinligini taʼkidladi.

YHTM olingan ruxsatnomasiz umumiy foydalanishdagi hududlarda yer qazish va taʼmirlash tadbirlarini bajarish, shuningdek, obyektlarni oʻzgartirish qonun boʻyicha javobgarlikka sabab boʻlishini eslatib oʻtdi.