Samarqand va Buxoroni pulli avtomagistral bilan bogʻlash rejalashtirilmoqda

Kutilishicha, ikki shahar oʻrtasida avtomobildagi yoʻl hozirgi besh soat oʻrniga bir yarim soat vaqt oladi. Xuddi shu yoʻnalishda tezyurar poyezdlar uchun temiryoʻl liniyasini yotqizish ham rejalashtirilmoqda. Sohaviy idoralarga avtomobil va temiryoʻl loyihalarining master-rejalarini yakunlash, shuningdek, potensial hamkorlar bilan muzokaralarga kirishish topshirildi. Qurilish qiymati, boshlanish muddatlari va moliyalashtirish manbalari hozircha aytilmagan.

Buxoro viloyatining oʻzida 2026-yilda A-380 trassasi uchastkasini rekonstruksiya qilish yakunlanishi kerak. 2027-yilda viloyat hududidagi M-37 yoʻlining 69 kilometrini yangilash ishlari boshlanadi. Ushbu loyiha 200 mln dollarga baholanmoqda, u Buxoro atrofidagi 4,5 km uzunlikdagi aylanma yoʻlni ham oʻz ichiga oladi.

Gazeta.uz maʼlumotlariga koʻra, Samarqand — Buxoro pulli trassasi 2024-yildan beri muhokama qilinmoqda: oʻshanda uning qiymati 1 mlrd dollarga baholangan, amalga oshirish 2027–2030-yillarga moʻljallangan va davlat-xususiy sheriklik asosida xususiy hamkorni jalb qilish koʻzda tutilgan edi.

Yigʻilishda, shuningdek, Buxoroda 300 mln dollarga qurilayotgan xalqaro aeroport haqida ham soʻz bordi. Prezident uni kirish yoʻli bilan birga 2027-yil 1-sentabrgacha yakunlashni topshirdi.