«Toshkent» aeroportida 2026-yilgi kuzgi spotting-tur boʻlib oʻtdi

Ishtirokchilar orasida professionallar ham, yangi boshlagan spotterlar ham bor edi. Ular perrondan samolyotlarning uchishi va qoʻnishi, laynerlarga texnik xizmat koʻrsatilishi hamda yerdagi xodimlarning ish jarayonini suratga oldi. Kadrga Uzbekistan Airways, Centrum Air, Silk Avia, Qanot Sharq, Fly Khiva, Air Astana, Fly Dubai, Flynas, S7, «Aeroflot» va boshqa aviatashuvchilarning yoʻlovchi hamda yuk samolyotlari muhrlandi.

Tadbirga faqat oldindan saralashdan oʻtgach kirish mumkin edi. Tashkilotchilar foto va videatexnikaning mavjudligi, arizachilarning sohaviy bloglar va ijtimoiy tarmoqlardagi faolligi, xalqaro spotting platformalaridagi nashrlari hamda avvalgi turlardagi tajribasini baholadi.

Uzbekistan Airports matbuot xizmatining soʻzlariga koʻra, besh yil ichida mamlakatda aviaspotterlar hamjamiyati sezilarli darajada kengaydi va uning aʼzolari orasida yoshlar koʻp. Kompaniyaning hisoblashicha, JetPhotos, Airliners.net va Planespotters.net platformalarida joylashtirilgan suratlar tobora koʻproq odamlarga Oʻzbekiston aviatsiya sohasi haqida maʼlumot olishga yordam bermoqda.

Oʻzbekistonda ilk rasmiy aviaspotting 2021-yil 22-oktabr kuni oʻtkazilgan. Oʻshandan beri turlar yiliga ikki marta, bahor va kuzda tashkil etiladi. 2022-yil 26-yanvar kuni Vazirlar Mahkamasi «Aviaspottingni rivojlantirish uchun shart-sharoitlar yaratish chora-tadbirlari toʻgʻrisida»gi qarorni qabul qilgan.