Toshkent hokimi 17,9 km uzunlikdagi yangi BRT avtobus yoʻlaklari toʻgʻrisidagi qarorni imzoladi

Eng katta uzunlik, 6,3 km, Mirzo Ulugʻbek shohkoʻchasidagi uchastkaga toʻgʻri keladi (Mirzo Ulugʻbek tumani). Muqimiy koʻchasida (Yakkasaroy va Chilonzor tumanlari) yoʻlak 4,6 km ni tashkil etadi. Shayxontohur tumanidagi Qoratosh va Koʻkcha Darvoza koʻchalarida 4,2 km, Parkent koʻchasida esa (Mirzo Ulugʻbek tumani) 2,8 km rejalashtirilgan.

Ishlar boʻyicha buyurtmachi etib «Toshkent Invest kompaniyasi» AJ tayinlandi. Kompaniya bosh loyihachi, bosh pudratchi va texnik nazorat tashkilotini tanlashi, shuningdek loyihalar boʻyicha «Loyihalar va xaridlarning samaradorligini oshirish markazi» davlat muassasasining ijobiy xulosalarini olishi lozim.

Ishlar uchun mablagʻlar tijorat banklari kreditlari, Toshkent shahar hokimligining Yoʻl va transport infratuzilmasini rivojlantirish jamgʻarmasi hamda Toshkent shahrini rivojlantirish jamgʻarmasi tomonidan beriladi. Oxirgisidan loyiha hujjatlari va buyurtmachi xarajatlari uchun dastlab 6,5 mlrd soʻm ajratiladi; markaz xulosasidan soʻng summa qayta hisoblab chiqiladi, qoldiq esa jamgʻarmaga qaytariladi.

Yoʻllarni taʼmirlash boshlanguniga qadar muhandislik tarmoqlari qurilishi, koʻchirilishi yoki taʼmirlanishi lozim — bu hokim oʻrinbosarlari Abdurahmon Baxtiyev va Obidjon Moʻminovga kommunal xizmatlar bilan birgalikda topshirildi. Quduqlar va kommunikatsiyalar ularning balansida boʻlgan tashkilotlar hisobidan tartibga keltiriladi. Ayrim uchastkalarda zarurat tugʻilganda harakat vaqtincha cheklanadi.