Buxoroning tarixiy markazida 1-oktabrdan elektrosamokatlar va rikshalar harakati cheklanadi

Cheklovlar zonasi — Ark qoʻrgʻonidan Labi Hovuz ansambligacha boʻlgan, Poi Kalon ansambli yonidan va Haqiqat koʻchasi boʻylab oʻtuvchi hudud; hudud xaritasi qarorga ilova qilingan. Bu yerda elektrosamokatlar, elektroskuterlar va mopedlardan tashqari, rikshalar, toʻrt gʻildirakli velosipedlar va kartinglar harakati, shuningdek, ot va tuyalarda yurish ham cheklanadi.

Qarorda qayd etilishicha, tarixiy markazda yoʻlovchi tashishga moʻljallanmagan rikshalar, velosipedlar, skuterlar, bolalar elektromashinalari va boshqa vositalar soni keskin oshib ketgan. Ularning tartibsiz harakati oqibatida sayyohlar xavfsizligi xavf ostida qolgan, piyodalarning jarohatlanish holatlari kuzatilgan. Qaror viloyat ichki ishlar boshqarmasining 15-sentabrdagi taklifiga asosan qabul qilingan.

Shahar ichki ishlar boʻlimi soliq inspeksiyasi va madaniy meros boshqarmasi bilan birgalikda zonaga kirish va chiqish joylariga koʻrsatkichlar hamda yoʻl belgilarini oʻrnatishi, tarixiy markazda faoliyat yuritayotgan fuqarolar va tashkilotlarni oldindan ogohlantirishi hamda talablarga javob bermaydigan vositalarda yoʻlovchi tashiganlik uchun javobgarlik haqida eslatishi lozim. Bunday vositalarda ishlovchilarga xizmatlarni maxsus ajratilgan joylarda, jumladan «Yangi Oʻzbekiston» va «Boqiy Buxoro» bogʻlarida koʻrsatish mumkinligi tushuntiriladi. Xizmatlar amalga oshirilgan ishlar yuzasidan 1-noyabrgacha hisobot berishi shart.