iPhone klaviaturasi 100 mingga yaqin soʻz va iboralarni taklif qilmaydi — Reuters

Kaufmanning hisob-kitoblariga koʻra, roʻyxatda xitoy iyerogliflaridan tashqari 100 mingga yaqin pozitsiya mavjud. Ularning aksariyatini soʻkishlar, haqoratlar hamda giyohvand moddalar, jinsiy aloqa va zoʻravonlik mavzularidagi soʻzlar tashkil etadi, biroq siyosiy iboralar ham uchraydi: «Dictator Trump», «Sleepy Joe», «Tibetan independence», «United Ireland». Ularni qoʻlda yozish mumkin, ammo ular avtotoʻldirishda paydo boʻlmaydi, svayp orqali terilganda esa tizim baʼzan ularni oʻxshash soʻzlarga almashtiradi, masalan, «Sleepy Joe»ni «Sleepy hope»ga.

Reuters maʼlumotlariga koʻra, shunga oʻxshash roʻyxatlar yana 27 ta til va yozuv tizimi uchun mavjud. Xususan, xitoy tilida Si Szinpinning laqabi va 1989-yildagi Tyananmen maydonidagi voqealar nomi bloklangan. Ruscha roʻyxatni tadqiqotchi faqat qisman shifrdan chiqardi. Uning hisob-kitoblariga koʻra, inglizcha roʻyxat iOS 14ʼdagi qariyb 1700 tadan iOS 27ʼda taxminan 4500 ta iboragacha kengaygan.

Kaufman sentabr oyida svayp orqali terishdagi nosozliklarni payqab qolgan va keyinchalik OpenAI Codex hamda Claude Code yordamida iOSʼning ichki fayllaridan maʼlumotnomani topgan. Iboralarning oʻzi tizimda saqlanmaydi — faqat ularning xeshlari mavjud. Muhandis Mett Syuishe ham mustaqil ravishda deyarli bir xil roʻyxatni olgan, Reuters jurnalistlari esa iboralarning bir qismini iPhoneʼda tekshirib koʻrgan. Tadqiqotchining oʻzi buni «senzuraning juda yumshoq shakli» deb atadi.

Appleʼdagilar muayyan bandlar va roʻyxat hajmini muhokama qilishdan bosh tortib, klaviatura nooʻrin yoki haqoratomuz boʻlishi mumkin boʻlgan variantlarni taklif qilmasligi kerakligini, foydalanuvchi esa istalgan matnni terish va taklifni rad etish huquqiga ega ekanini tushuntirdi.