SafeRoad operatori foydalanuvchilar maʼlumotlari sizib chiqqani haqidagi xabarlarni rad etdi

«Maʼlumot haqiqatga toʻgʻri kelmaydi», — deyiladi SAFE Service bayonotida. Kompaniyaning taʼkidlashicha, tarqatilayotgan maʼlumotlarning unga aloqasi yoʻq, foydalanuvchilarning axborotlari esa Oʻzbekiston qonunchiligiga muvofiq himoyalangan. SAFE Serviceʼning soʻzlariga koʻra, ushbu maʼlumotlar tarqalishi munosabati bilan u vakolatli davlat organlari bilan hamkorlik qilmoqda. Oʻzbekistonda SafeRoad ilovasidan avtomobil jarimalarini toʻlash va OSAGO rasmiylashtirish uchun foydalaniladi.

Bir kun avval ijtimoiy tarmoqlarda bir nechta servislar: SafeRoad, inDrive, Lada Auto, KiwiTaxi va Fargo mijozlarining shaxsiy maʼlumotlari bazalari sizib chiqqan boʻlishi mumkinligi haqida xabarlar paydo boʻldi. Raqamli texnologiyalar boʻyicha ekspert Shuhrat Qurbonovning aytishicha, u ushbu maʼlumotlarni tekshirib koʻrib, ularning ichida oʻz maʼlumotlarini: JShShIR, yashash manzili, avtomobillari va ularning hujjatlari toʻgʻrisidagi axborotni topgan. Uning soʻzlariga koʻra, u yerda asosan elektron pochta kabi umumiy maʼlumotlarni koʻrishni kutgan edi.

Boshqa xabarlarda bazalarda ID-kartalar, jarimalarni toʻlashga biriktirilgan bank kartalari va ilovaga kirilgan qurilmalar maʼlumotlari, shuningdek, xaridlar, yetkazib berishlar hamda bir necha yil oldin dorixonalardan sotib olingan dori-darmonlar haqidagi maʼlumotlar boʻlishi mumkinligi aytilgan. Ushbu maʼlumotlarning tilga olingan servislarga aloqadorligi va ehtimoliy sizib chiqish koʻlami qanchalik kattaligi aniqlanmagan. Sizib chiqishning mustaqil tasdigʻi yoʻq, qolgan servislarning rasmiy munosabati haqida xabar berilmagan.