Google DeepMind virtual olamlarni yaratish uchun Genie 4 modelini taqdim etdi

Yaratilgan olam boʻylab klaviatura orqali harakatlanish, sahnani esa matnli soʻrovlar orqali oʻzgartirish mumkin: kamerani boshqa joyga koʻchirish, ob-havoni almashtirish, odamlar va buyumlarni qoʻshish. DeepMindʼning maʼlum qilishicha, kompaniyaning olam modellari orasida Genie 4 birinchi boʻlib mustaqil ravishda ovoz yaratadi — shamol va toʻlqinlar shovqinidan tortib musiqagacha, qahramonlar esa gaplashadi va foydalanuvchining harakatlariga javob qaytaradi. Dasturchilar, shuningdek, toʻqnashuvlar, aerodinamika va odamlarning harakatlari yanada ishonarli boʻlganini taʼkidlamoqda.

Sodir boʻlayotgan hodisalarning izchilligini Gemini 3.8 Flash nazorat qiladi: model kadrlarni tahlil qiladi, maqsadni bosqichlarga ajratadi va ularning bajarilishini tekshiradi. Alohida ravishda kompaniya robototexnika sohasidagi tadqiqotlar uchun Genie 4ʼning Gemini 4 Argon bilan bogʻlanmasini sinovdan oʻtkazmoqda — namoyishda odamsimon virtual Apollo roboti shashka oʻynagan.

The Verge maʼlumotiga tayanib 3DNewsʼning xabar berishicha, olam bilan oʻzaro aloqa endi ikki daqiqagacha davom etadi — bu 2026-yil yanvar oyida AQShdagi AI Ultra obunachilariga taqdim etilgan Genie 3 modelidagiga qaraganda ikki baravar koʻp. Kompaniya cheklovlar borligini tan oladi: uzoq davom etadigan simulyatsiyada obyektlar oʻz koʻrinishi va joylashuvini oʻzgartirishi mumkin, ovoz aniqligi, fizika, fazoviy mutanosiblik hamda oʻqiladigan matnning aks ettirilishi esa takomillashtirishni talab qiladi.

Google modelni oʻyinlarning prototiplarini yaratishda, kino uchun sahnalarni oldindan vizuallashtirishda hamda robotlar va sunʼiy intellekt agentlari uchun mashgʻulot muhitlarini yaratishda qoʻllash mumkin deb hisoblaydi. Hozirda Genie 4 cheklangan doiradagi sinovchilar uchun tadqiqot rejimida ishlamoqda. Keyinroq Project Genie xizmatidagi AI Ultra tarifi obunachilariga, shuningdek, Gemini API va Google AI Studio bilan ishlovchi hamkorlarga kirish imkoniyati berilishi rejalashtirilgan. Muddatlarni kompaniya maʼlum qilmagan.