Soliq qoʻmitasi AI Soliq platformasiga uchta yangi xizmatni qoʻshdi

Ekspress audit tadbirkorga oʻz kompaniyasining soliq holatiga inspektor nigohi bilan qarash, ehtimoliy qoidabuzarliklarni aniqlash va ularni bartaraf etish boʻyicha maslahatlar olish imkonini beradi. AI Muloqot orqali soliq organlari bilan bogʻlanish va elektron murojaat yuborish mumkin, AI Assistent esa soliq masalalari boʻyicha maslahat beradi. Bundan tashqari, platformada AI Imtiyoz, AI Hisobot, AI HHF, AI Reyting, AI Avtokameral va AI Keshbek ishlamoqda. Platforma tadbirkorlar, buxgalterlar, korxona rahbarlari va jismoniy shaxslar uchun moʻljallangan.

Elmuradovning soʻzlariga koʻra, hozircha AI Soliq axborot-maʼlumot tizimi va yordamchi vazifasini oʻtamoqda, soliq toʻlovchi yoki inspektorsiz mustaqil ravishda qaror qabul qilmaydi. Uning asosida oʻzbek tili xususiyatlari va soliq maʼmurchiligi boʻyicha oʻqitilgan katta til modeli yotadi. Javoblarning toʻgʻriligini toʻrt nafar mutaxassisdan iborat guruh kuzatib boradi. «Biz doim bu sunʼiy intellekt ekanini, u xato qilishi mumkinligini, shuning uchun imkon qadar uning javoblarini tekshirish kerakligini aytamiz», — dedi maslahatchi.

Elmuradov yakuniy qarorni inson qabul qilishi va oʻz harakatlari uchun oʻzi javob berishini tushuntirdi. Anhor.uz muxbirining taʼkidlashicha, tizimning notoʻgʻri maslahati jarima yoki zararga olib kelgan taqdirda kompensatsiya toʻlanishi haqidagi savolga aniq javob berilmadi.

2026-yilda qoʻmita xavfsizlik siyosatini SI haqidagi alohida boʻlim bilan toʻldirdi. Tizim yopiq infratuzilmada ishlaydi, maʼlumotlar ichki serverlarda qayta ishlanadi va Oʻzbekiston hududidan tashqariga uzatilmaydi, deb ishontirdi idora vakili.