Apple OLED-ekran va A20 Pro chipiga ega yangi iPad mini planshetini taqdim etdi

Buyurtmalarni 28-oktabrdan boshlab 36 ta mamlakat va mintaqada, jumladan AQShda rasmiylashtirish mumkin boʻladi. Wi-Fiʼli model kamida $699, uyali aloqaga ega versiya esa $849 ga tushadi. 128, 256 va 512 GB xotiraga ega variantlar hamda ikkita korpus rangi — Midnight va Starlight mavjud. Kompaniya alohida taqdimot oʻtkazmadi.

Ekran diagonali 24% ga ingichkalashgan ramkalar hisobiga 8,3 dan 8,5 dyuymgacha kattalashdi; yangilanish chastotasi 60 Gts ligicha qoldi. Korpus qalinligi — 5,4 mm, ogʻirligi esa Wi-Fiʼli versiyada 255 g va uyali aloqaga ega versiyada 263 g ni tashkil etadi. Apple maʼlumotlariga koʻra, yangilik avvalgisidan 13% ga yengilroq va 14% ga yupqaroq.

A20 Pro chipi 2 nm texjarayon asosida ishlab chiqariladi. Kompaniya testlariga koʻra, koʻp oqimli unumdorlik 60% gacha, grafik unumdorlik 2,7 baravargacha, SI-hisoblashlar tezligi esa 4,5 baravargacha oshgan. Konfiguratsiyalar farqlanadi: 128 va 256 GB li versiyalar besh yadroli CPU, 512 GB li versiya esa olti yadroli va ikkita Neural Engine blokini oldi. Barcha modellarda grafik protsessor yetti yadroli.

Ikkala kamera ham 12 Mp ruxsatga ega, old kamera uzun qirraga koʻchirildi. Yangi Acoustic Display akustikasi past chastotalarni displey orqali uzatadi. Simsiz aloqa uchun Wi-Fi 7, Bluetooth 6 va Threadʼga ega N1 chipi javob beradi, uyali aloqa versiyalarida 5G va faqat eSIMʼga ega C2 modemi oʻrnatilgan. Akkumulyator alohida sotiladigan 35 Vt dan boshlanuvchi adapter bilan taxminan 30 daqiqada 50% quvvat oladi. SI funksiyalariga ega Siri hozircha beta-versiyada ishlamoqda.