Apple Walletʼda Oʻzbekistonning sakkizta banki va fintex-servislari roʻyxati paydo boʻldi

Roʻyxat Apple Walletʼga ATTO transport kartasini qoʻshishga urinish chogʻida paydo boʻldi: ilova unga Oʻzbekistonda chiqarilgan bank kartalarini ulash mumkinligi haqida bildirishnoma berdi. Apple roʻyxatida — Uzum va Hamkorbank (Visa), shuningdek, Orient Finans Bank, Oʻzbekiston Milliy banki, Kapitalbank, Ipak Yoʻli banki, TBC Bank va Octobank (Visa va Mastercard) mavjud. Apple ayrim banklar kartalarning barcha turlarini qoʻllab-quvvatlamasligi mumkinligini va roʻyxat toʻldirib borilishini eslatib oʻtadi. Shu bilan birga, Apple saytida Oʻzbekiston hozircha Apple Pay mavjud boʻlgan davlatlar qatorida yoʻq — ushbu sahifa oxirgi marta 19-oktabrda yangilangan.

Oʻzbekistonda Google Pay ishga tushirilgani haqida 19-oktabr kuni Google Cloud vakili Samarqandda C5+1 uchrashuvlari doirasida oʻtkazilgan raqamli texnologiyalar boʻyicha tadbirda eʼlon qilgan edi. Google saytida mamlakat Google Wallet ilovasi va kontaktsiz toʻlov ishlaydigan hududlar qatoriga kiritilgan, ammo kartalar servisga ulanishi ham 27-oktabrdan boshlandi. Anhor.uz yozishicha, ijtimoiy tarmoqlardagi baʼzi foydalanuvchilar kartalar muvaffaqiyatli ulanganini xabar qilmoqda, boshqalari esa xatoliklarga duch kelmoqda. Nashr eʼlon qilingan vaqtda Google Wallet uchun tasdiqlangan banklar roʻyxati hamda HUMO va Uzcard kartalari toʻliq qoʻllab-quvvatlanishining rasmiy tasdigʻi mavjud emas edi.

22-oktabr kuni Turizm qoʻmitasi Google Pay allaqachon ishlayotgani, Apple Pay esa yaqin kunlarda kutilayotgani haqida xabar berdi. Idora maʼlumotlariga koʻra, integratsiyani Markaziy bank va tijorat banklari HUMO hamda Uzcard bilan birgalikda olib bormoqda. 26-mart kuni Prezident Shavkat Mirziyoyev fuqarolarning shaxsiy maʼlumotlarining bir qismini xorijda saqlash va qayta ishlashga muayyan shartlar asosida ruxsat beruvchi qonunni imzolagan edi; maʼlumotlarni mahalliylashtirish boʻyicha avvalgi talablar ushbu servislarning kirib kelishiga toʻsiqlardan biri hisoblanardi.