Apple M6 chipidagi iMac va 14 dyuymli MacBook Proʼni taqdim etdi

Har ikkala kompyuter Wi-Fi 7 va Bluetooth 6 texnologiyalarini qoʻllab-quvvatlaydi. Buyurtmalar 35 ta mamlakat va mintaqada qabul qilinadi. AQShda kichik iMac narxi $1499 dan, kattasi — $1699 dan, MacBook Pro esa $1999 dan boshlanadi. 3DNews maʼlumotlariga koʻra, oʻtgan avloddagi noutbuk ham xuddi shuncha turgan.

iMac yupqa korpus hamda nominal diagonali 24 dyuym (amalda 23,5) boʻlgan Retina 4,5K ekranini saqlab qolgan. M6 ikki xil variantda taqdim etilgan: 10 yoki 12 yadroli protsessor va grafikaga ega. Ikkala versiyaning bazaviy komplektatsiyasida 16 GB xotira va 256 GB SSD mavjud. Apple oʻlchovlariga koʻra, M4 chipidagi iMac bilan taqqoslaganda Excelʼdagi ish 1,5 baravargacha, Affinityʼda fotosuratlarga ishlov berish ikki baravargacha, LM Studioʼda lokal neyrotarmoqlarga soʻrovlar yuborish besh baravargacha tezlashgan. Katta versiyada ikkita oʻrniga toʻrtta Thunderbolt 4 porti, 2,5 Gbit/s tezlikdagi Ethernet hamda Touch ID bilan jihozlangan klaviatura bor. Kichik versiya uchun simli port qoʻshimcha $30 ga tushadi.

MacBook Proʼdagi M6 chipi 12 tadan CPU va GPU yadrolariga ega. Kompaniya M5 bilan solishtirganda grafika unumdorligi 30% ga, SI vazifalari tezligi esa 25% ga oshganini maʼlum qilmoqda. Noutbuk HDR rejimida yorqinligi 1600 nitgacha boʻlgan Liquid Retina XDR ekrani, 16 dan 32 GB gacha xotira, uchta Thunderbolt 4 porti, HDMI, MagSafe 3 va SDXC slotiga ega boʻldi. Apple maʼlumotlariga koʻra, avtonom ishlash vaqti 24 soatgacha yetadi. 96 Vt quvvatdan boshlanadigan adapter bilan batareya taxminan 30 daqiqada 50% gacha quvvatlanadi. Noutbuk macOS 27 boshqaruvida ishlaydi.