Discord ommaviy serverlardagi xabarlar qidiruv tizimlarida indekslanishini eʼlon qildi

Yangilik faqat Server Discovery katalogidagi serverlarga taalluqli boʻladi. Kompaniya maʼlumotlariga koʻra, bunday hamjamiyatlar soni 63 mingtadan ortiq. Kod.ruʼning aniqlik kiritishicha, ularda kamida 1000 nafar ishtirokchi bor, ular kamida sakkiz hafta faoliyat yuritmoqda va ularga taklifnomasiz kirish mumkin. Oʻzgarishlar shaxsiy serverlar, shaxsiy va guruh yozishmalariga daxldor boʻlmaydi.

16-noyabrdan boshlab bunday har bir server tavsif hamda ochiq kanallardagi muhokamalarning avtomatik dayjestlari joy olgan alohida veb-sahifaga ega boʻladi. Dekabr oʻrtalaridan boshlab ushbu sahifalarda va qidiruv natijalarida alohida xabarlar paydo boʻlishni boshlaydi. Kompaniyaning ogohlantirishicha, ishga tushirish bosqichma-bosqich amalga oshiriladi. Mualliflarning ismlari va avatarlari koʻrsatilmaydi. 3DNews Mashableʼga tayanib yozishicha, bunday xabarlarni Google orqali Discord akkauntisiz ham oʻqish mumkin boʻladi.

Administratorlar Server Settings → Web Presence boʻlimida alohida kanallarni yoki butun serverni qidiruvdan olib tashlashi, shuningdek dayjestlarni oʻchirib qoʻyishi mumkin. Foydalanuvchi User Settings → Data and Privacy boʻlimida oʻz xabarlarining koʻrsatilishini taqiqlashi mumkin, biroq ular baribir kanallarning dayjestlariga tushadi. Yevropa Ittifoqi, Buyuk Britaniya, Kanada, Braziliya, Avstraliya va Janubiy Koreyada huquqiy cheklovlar tufayli xabarlarni koʻrsatish sukut boʻyicha oʻchirilgan. Funksiyadan oʻsmirlar foydalana olmaydi.

Eʼlon tanqidlarga sabab boʻldi. Habrʼning yozishicha, foydalanuvchilarning bir qismi ularning soʻzlarini dastlabki kontekstdan tashqaridagi odamlar koʻrishidan xavfsiramoqda, boshqalari esa ushbu muhokamalar sunʼiy intellekt modellarini oʻqitish uchun materialga aylanmasmikan deb soʻramoqda.