Huawei Kirin chiplaridagi Enjoy 100 va Pura 90 Plus smartfonlarini taqdim etdi

Enjoy 100 liniyasidan Enjoy 100, 100 Pro va 100 Pro Max modellari oʻrin oldi. Bazaviy versiya Kirin 8000S protsessorida ishlaydi hamda 90 Gts chastotali 6,56 dyuymli JK-ekranga ega boʻldi, Pro esa — 6,7 dyuymli OLED-displey va Kirin 8020A chipi bilan jihozlandi. Har ikkisida ham 6100 mA·soatlik batareya oʻrnatilgan. Pro Max 6,84 dyuymli ekrani va 8800 mA·soatlik akkumulyatori bilan ajralib turadi; 512 GB xotirali varianti Kirin 8020 asosida, qolganlari esa Kirin 8020A asosida ishlab chiqilgan. 3DNews maʼlumotlariga koʻra, narxlar Enjoy 100 uchun $210 dan, Pro uchun $270 dan va Pro Max uchun $300 dan boshlanadi.

Pura 90 Plus Kirin 9025 asosida ishlaydi hamda 1 dan 120 Gts gacha chastotali 6,8 dyuymli LTPO OLED-ekran bilan jihozlangan. Bir dyuymli formatdagi sensorga va f/1,6–4,0 oʻzgaruvchan diafragmaga ega 50 MP asosiy kamera 40 MP li oʻta keng burchakli modul va 4 karrali optik zumga ega 48 MP li teleobyektiv bilan toʻldirilgan. 5700 mA·soatlik batareya sim orqali 100 Vt gacha va simsiz 80 Vt gacha quvvatlanadi. Tezkor xotira 12 GB, doimiy xotira esa 256 GB, 512 GB yoki 1 TB ni tashkil etadi.

Kod.ru nashrining IThomeʼga tayanib xabar berishicha, Xitoyda bu versiyalar 5499, 5999 va 6999 yuan turadi, 30-noyabrgacha esa 300 yuangacha chegirma amal qiladi. Taqdimotdan biroz oldin Huawei oldingi Enjoy 90 seriyasining umumiy yetkazib berish hajmi chiqarilganidan keyingi yetti oy ichida 10 mln qurilmadan oshganini maʼlum qildi; kompaniya modellar boʻyicha taqsimotni ochiqlamadi.