Oʻzbekistonda sunʼiy intellekt boʻyicha “Oq kitob” tayyorlanadi

Hujjat ishlab chiqilayotgani haqida vazirlik vakili ICT Week Uzbekistan 2026 haftaligi doirasidagi Future Intelligence sessiyasida eʼlon qildi. Pekosning soʻzlariga koʻra, mazkur hujjat respublikada sunʼiy intellektni rivojlantirishni tarqoq tashabbuslardan tasdiqlangan 2030-yilgacha SI texnologiyalarini rivojlantirish strategiyasi doirasidagi tizimli joriy etishga oʻtkazishga qaratilgan. “Oq kitob” milliy ekotizimni baholash, uning cheklovlari va texnologiyalarni amaliy qoʻllash uchun istiqbolli yoʻnalishlarni aniqlash, shuningdek, investorlar uchun imkoniyatlar xaritasi vazifasini oʻtashga moʻljallangan.

Tadbir davomida EGOV CLOUD MHM vakili Asliddin Abdufattaxov MyGov portaliga sunʼiy intellektni joriy etish rejalari haqida soʻzlab berdi. Yaqin vaqt ichida MyGov AI Assistant ovozli va matnli yordamchisi, arizalarni ovoz orqali toʻldirish tizimi MyGov Speech to Text hamda hujjatlarni tanish xizmati Document AI ishga tushirilishi rejalashtirilgan. Shuningdek, 20 ta xizmatni bevosita tashrif buyurmasdan onlayn rejimga oʻtkazish, 80 ta xizmat boʻyicha muddatlarni qisqartirish va 25 ta jarayon narxini pasaytirish koʻzda tutilgan.

Raqamli texnologiyalar vaziri oʻrinbosari Jamol Maxsudov ham Oʻzbekiston Sunʼiy intellekt sohasida butunjahon hamkorlik tashkilotiga aʼzo boʻlganini bildirdi. AI Alliance direktori Aziz Muxitdinovning maʼlumotlariga koʻra, 2025-yildan buyon birlashmaga 40 ta tashkilot, jumladan, davlat organlari, kompaniyalar va oliy taʼlim muassasalari kirgan.