Toshkentda ICT Week Uzbekistan 2026 AKT haftaligi boshlandi

Tadbirlar va koʻrgazma doirasida sunʼiy intellekt, aloqa tarmoqlari, bulutli hisoblashlar, biometrik identifikatsiya va raqamli tibbiyot sohasidagi ishlanmalar taqdim etildi. Toshkent shahar hokimligining Raqamli rivojlanish departamenti 20 ga yaqin raqamli loyiha taqdimotidan iborat stendini ochdi.

Ucell telekom-operatori maʼlumot uzatish tezligi 1 Gbit/s gacha boʻlgan 5G tarmogʻi ishlashini, shuningdek, Qoraqalpogʻiston Respublikasida quvvati 1500 MVt boʻlgan hamda 300 MVt quvvatli energiya saqlash tizimiga ega Kungrad Wind Power Plant shamol elektr stansiyasi uchun telekommunikatsiya infratuzilmasi loyihasini namoyish etdi. Korporativ mijozlar uchun operator buyumlar interneti tizimlari, geoanalitika, atrof-muhit monitoringi va telekom-maʼlumotlar asosidagi skoring algoritmlarini koʻrsatdi.

Huawei kompaniyasi Advancing All Intelligence mavzusi ostida texnologiyalarni, jumladan 5G va 5.5G, optik tarmoqlar, Wi-Fi 7 korporativ aloqasi uchun yechimlar, bulutli xizmatlar va maʼlumotlarni saqlash tizimlarini taqdim etdi. Haftalikning ochilish marosimida Huawei kompaniyasining Markaziy Osiyo boʻyicha vitse-prezidenti Van Si sunʼiy intellektning iqtisodiyot va davlat boshqaruvidagi rolini taʼkidladi.