Vazirlar Mahkamasi FVV Akademiyasi huzuridagi qutqaruvchilar texnikumi faoliyati tartibini tasdiqladi

U yerga umumtaʼlim maktablari bitiruvchilari davlat grantlari yoki toʻlov-kontrakt asosida oʻqishga qabul qilinishi mumkin. Oʻquv dasturlari — boshlangʻich, oʻrta va oʻrta maxsus professional taʼlim. Qutqaruvchi lavozimida ishlayotgan va texnikum oʻquvchisiga aylanadigan favqulodda vaziyatlar organlari xodimlarining oʻqish davrida oylik maoshi saqlanib qoladi.

Yirik iqtisodiy obyektlar, toifalangan obyektlar va xavfli ishlab chiqarishlarning qutqaruvchilari uchun oʻz tashkilotlari buyurtmasiga binoan toʻlov-kontrakt asosida imtiyozli qabul koʻzda tutilgan. Bundan tashqari, texnikum mehnat bozori ehtiyojlari, ish beruvchilarning takliflari hamda FVV buyurtmalariga asoslangan holda qisqa muddatli professional kurslarni tashkil etadi. Oʻquvchilar amaliyoti uchun simulyatsiya, imitatsiya va virtual laboratoriyalar hamda poligonlar koʻzda tutilgan. 2029-yildan boshlab bitiruvchilardan favqulodda vaziyatlar organlarining kadrlar zaxirasi shakllantiriladi.

Texnikum alohida yuridik shaxs boʻladi va FVV Akademiyasining yagona taʼlim shaharchasi hududida joylashadi. Vazirlikka ustavni tasdiqlash va davlat roʻyxatidan oʻtkazish uchun ikki oy, Professional taʼlim agentligi bilan birgalikda oʻquv rejalari va dasturlarini ishlab chiqish hamda tasdiqlash uchun esa uch oy muddat berildi. Qabul koʻrsatkichlari boʻyicha takliflarni FVV har yili 1-fevralgacha agentlikka yuboradi. Texnikum tashkil etilishi avvalroq Prezidentning 2026-yil 3-apreldagi PQ-123-son qarorida koʻzda tutilgan edi.