Oʻzbekiston maktablarida insult belgilarini aniqlashni oʻrgatish boshlanadi

«FAST — superqahramonlar» — Angels Initiative xalqaro tashkilotining 1–4-sinf oʻquvchilari uchun moʻljallangan taʼlim dasturi. Oʻzbekistonda u Prezidentning 20-yanvardagi qarori bilan qabul qilingan Infarkt va insultga qarshi kurashish milliy dasturi doirasida joriy etilmoqda. Birinchi bosqichda mashgʻulotlar 13 ta maktabda oʻtkaziladi: Toshkent shahrining Olmazor tumanidagi yettita va Samarqand shahri, Kattaqoʻrgʻon hamda Ishtixon tumanlaridagi oltita maktabda.

Bolalarga oʻyin shaklida, qahramonlar va videolar orqali yuz asimmetriyasi, bir qoʻlni koʻtara olmaslik va nutqning qiyinlashishi insult belgilari boʻlishi mumkinligi tushuntiriladi. Bunday holatda vaqtni boy bermaslik kerak: zudlik bilan kattalarga aytish va 103 raqami orqali tez yordam chaqirish lozim. Dastur gʻoyasiga koʻra, bolalar ushbu bilimlarni ota-onalari, buvi va buvalari bilan boʻlishadilar.

Vazirlik maʼlumotlariga koʻra, dastur qariyb 40 ta mamlakatda 2 milliondan ortiq bolani qamrab olgan. Uning oʻzbekcha versiyasi uchun rasmiy sayt va ijtimoiy tarmoqlardagi sahifalar ishga tushirildi.